MGA ISYU AT IBA PA...
Linggo, Marso 10, 2024
LTFRB CHIEF GUADIZ KUMPIYANSANG MAPAPATUPAD ANG PUVMP SA KABILA NG MGA BALAKID
Ni: Rjhay E. Laurea
Larawan mula sa Philippine News Agency (PNA)
MATAPOS ang pagkakabasura ng isang kaso na nagkukuwestiyon sa legalidad ng Public Utility Vehicle Modernization Program (PUVMP) ng pamahalaan, kumpiyansa si Land Transportation Franchising and Regulatory Board (LTFRB) Chairperson Teofilo Guadiz III na kaparehong resulta rin ang makukuha ng iba pang naihain na kaso laban dito.
​
"Base ho sa nangyari ngayon na desisyon ng Supreme Court, kung ito ho ang aming pagbabasehan, ako ho ay tiwala na ganoon din po ang mangyayari – ito ay ibabasura at ito po ay ibaba sa mga trial courts or sa Court of Appeal para po litisin iyong mga issues na idinulog po ng mga naghain ng petition kontra dito sa PUVMP," sabi ni Guadiz sa isang panayam sa Bagong Pilipinas Ngayon kamakalawa.
​
Naisambit ni Guadiz ang pahayag nang matanong siya tungkol sa dalawa pang nakabimbinbing kaso sa Korte Suprema na humahamon sa implementasyon ng modernization program matapos na mabasura ang petisyon na inihain ng Bayyo Association, Inc. (Bayyo).
​
Ikinalugod naman ng LTFRB chief ang naging desisyon ng Korte Suprema at sinabi pang pagpapakita lamang ito na kinikilala ng pinakamataas na hukuman ang kahalagahan ng PUVMP sa pagsisikap na ma-modernisa ang pampublikong transportasyon.
​
Ngunit sa kabila nito, nirerespeto pa rin ng ahensiya ang susunod na hakbang ng nabanggit na transport group na nakatakda pa ring umapela sa Korte Suprema.
​
"Iginagalang po namin ng Bayyo Philippines, pero nagsabi na po ang ating mataas na korte po, ang Korte Suprema na unang-una po, dinenay (deny) na ho nila iyong PUVMP dahil napansin ho sila wala hong legal standing iyong mga nag-file ng petition at dapat daw ho ito inihain po sa mababang kapulungan muna or sa mga affiliate courts or trial court. So, ang ultimong remedyo po nila dito is to re-file the case back to the trial courts," paliwanag ni Guadiz.
​
Muli namang binigyang diin ni Guadiz na ang layon ng PUVMP ay mapabuti, maging mabisa at ligtas ang serbisyo ng transportasyon para sa mga Pilipino at walang katotohanan na may negatibong epekto ito sa drivers at operators sa buong bansa.###
MGA ISYU AT IBA PA...
Miyerkules, Hulyo 26, 2023
UMANGAT NA KONDISYON NG PILIPINAS, LAMAN NG SONA NI PBBM;
BAGONG PILIPINAS IBINIDA
Ni: Khryzz Daynata
Larawan ng nagpoprotestang mga kritiko ni PBBM. Kuha ni: Alfredo Patriarca, Jr.
PREPARASYON:
​
PINAGHANDAAN, inabangan at pinakinggan ng iba’t ibang sector ng pamahalaan, gayundin ng mga ordinaryong mamamayan, ang ikalawang State of the Nation Address (SONA) ni Pangulong Ferdinand “Bongbong” Marcos Jr. nitong Lunes, Hulyo 24, 2023.
​
Hindi biro ang naging paghahanda ng iba’t ibang ahensya ng gobyerno sa seguridad ng SONA sa loob at labas ng Batasang Pambansa.
​
Aabot sa 22,000 pwersa ng PNP at 500 mula sa Armed Forces of the Philippines (AFP) at libo-libong force multipliers ang itinalagang magbantay sa SONA upang matiyak na hindi makakalusot ang masasamang loob na ang tanging layunin ay makapaghasik ng lagim at kaguluhan .
​
Layunin din ng mahigpit na seguridad ang hindi masamantala at mapasukan ng mga terorista ang hanay ng iba’t ibang grupo na nagsagawa ng kilos-protesta kasabay ng SONA ng Pangulo.
​
Ilang oras bago ang SONA, inabangan ng publiko ang magagarbong kasuotan ng mga opisyal ng gobyerno kasama ang kanilang mga kabiyak na rumampa sa plenary hall.
​
Kanya-kanyang pasikat at interpretasyon ng kasuotan ang inirampa ng mga Senador, Kongresista at iba pang opisyal ng gobyerno na dumalo sa SONA.
​
SONA PROPER:
​
Dakong 3:43 ng hapon ay dumating sa bakuran ng Batasang Pambansa si PBBM, nagtungo siya sa plenary hall at tumayo sa malaking led screen kung saan ipinapakita ang mga aktibidad na kanyang pinangunahan, gayundin ang pagbisita niya sa ibang bansa upang manghikayat ng investors at patibayin ang kooperasyon at alyansa sa ibang bansa.
​
Pasado alas-4:00 ng hapon sinimulan ni PBBM ang kanyang ikalawang ulat sa bayan.
​
Sa kanyang ulat, kumpiyansa ang Pangulo na bumubuti at maayos ang estado ng bansa at ito aniya ay hudyat ng pagsilang ng Bagong Pilipinas.
​
Aniya, ang kanyang kumpiyansa ay lalo pang pinalakas ng pagpapakita ng world-class Filipino workforce ng pagmamahal sa kanilang sariling bayan.
​
“Ang bawat Pilipino ay nagkakaisa sa pagbangon sa hamon na ginawa natin sa kanila na maging bahagi ng kinabukasan ng bansa. Handa silang maghandog ng tulong, dahil mahal nila ang kanilang kapwa Pilipino, at mahal nila ang Pilipinas,” pahayag ni PBBM.
​
“Gamit ito sa aking puso, alam ko na ang estado ng bansa ay maayos at bumubuti. Dumating na po ang Bagong Pilipinas,” paliwanag pa ni PBBM.
​
Matatandaang nitong nakalipas na taon, sinabi ni PBBM na ang pag-alam sa pagkakaroon ng napakalaking grupo ng mga may mataas na kakayahan at dedikadong manggagawa na naglilingkod sa gobyerno ay pinagmumulan ng malaking pag-asa at optimismo para sa kanya, at idinagdag na nasa burukrasya ang pagbibigay sa kanila ng mahusay na pamumuno at patnubay.
​
“Mahal nila ang Pilipinas at tumugon sa aming panawagan,” pagdidiin ni PBBM.
​
Ang ikalawang SONA ng Pangulo ay nagsaliksik sa mga nagawa ng administrasyon sa iba’t ibang larangan tulad ng ekonomiya, pagpapaunlad ng imprastraktura, agrikultura, kapayapaan at kaayusan, turismo, enerhiya, pagsisikap sa kapayapaan ng Mindanao at marami pang iba.
​
Binanggit din ng Punong Ehekutibo ang mga planong gustong isagawa ng kanyang pamahalaan sa hinaharap upang mapanatili ang pag-unlad ng bansa.
​
Sa unang yugto ng kanyang talumpati ay inilatag nito ang mga programa at pangakong kanyang natupad tulad na lamang ng pagbagon ng ekonomiya mula sa pandemya.
​
Ipinagmalaki din ni PBBM na nakamit ng bansa ang 7.6 growth domestic product (GDP) na pinakamataas sa loob ng 40-taon.
​
Ibinida ni PBBM ang kanyang solusyon sa naging problema ng bansa, lalo na sa pagtaas ng presyo ng mga bigas, isda, gulay at iba’t ibang uri ng pagkain.
​
Nais aniyang magpatayo ng Kadiwa centers sa iba’t ibang lugar sa bansa .
​
Lumakas din aniya ang tax collection nitong Mayo at umangat ng 10% ang itinaas sa unang limang buwan na mahigit 1.5 trillion pesos, at nais din nya na i-calibrate ang serbisyo ng pamahalaan sa pagyakap sa digitalization.
​
Tuloy-tuloy din aniya ang laban ng pamahalaan sa droga kung saan isusulong umano niya ang pagkakaroon ng programa para i-rehab ang mga nalulong sa droga at tulungan silang magbagong buhay.
​
Nais din ni PBBM na palakasin pa ang Armed Forces of the Philippines at ang Philippines National Police.
​
Prayoridad din niya ang edukasyon, kalusugan, job creation, paglaban sa climate change at kapakanan ng mga overseas Filipino workers.
​
PANGKALAHATANG MAPAYAPA:
​
Natapos ang SONA ni PBBM nang maayos at mapayapa.
​
Ayon sa PNP, walang masamang insidente na naiulat sa Batasang Pambansa Complex sa Quezon City, iba pang lokasyon sa Metro Manila, at mga pangunahing lungsod sa buong bansa kung saan idinaos ang mga protesta kabilang ang transport strike.
​
Ito ay bunga na rin ng inilatag na seguridad ng PNP at pagpapatupad ng maximum tolerance sa kabila ng ilang “uncalled-for actions” ng mga nagpoprotesta tulad ng pagsunog ng mga effigies at “illegal” assemblies na humahadlang sa trapiko.
​
“Muli, binabati ko ang lahat ng naka-deploy na tauhan para sa mahusay na trabaho, at taos-pusong pasasalamat sa lahat ng iba pang ahensyang tumulong sa pagpapanatili ng kapayapaan at kaayusan. Sama-sama, buuin natin ang isang mas ligtas na bansa para sa lahat,” pahayag ni PNP chief Gen. Benjamin Acorda jr.
​
Sa isang hiwalay na pahayag, sinabi ni National Capital Region Police Office (NCRPO) chief Police Brigadier General Jose Melencio Nartatez, na walang nasaktan o nasugatan sa mass demonstrations.
​
“Walang nasaktan o nasugatan habang ang mga kalahok ng mass demonstrations sa Metro Manila ay pinanatili ang kanilang mga aktibidad sa pagsunod sa mga patakaran at hangganan ng batas,” pahayag ni Nartatez.
​
Sinabi ni Nartatez na mahigit 14,000 katao ang lumahok sa mga aktibidad na pro- at anti-administrasyon ng SONA.
​
Sinimulan ng mga progresibong grupo ang kanilang mga aktibidad sa Quezon Memorial Circle (QMC) at sa kahabaan ng Commonwealth Avenue sa Quezon City alas-7 ng umaga at natapos bandang alas-2 ng hapon.
​
Samantala, nagsagawa ng konsiyerto ang mga tagasuporta ni Marcos malapit sa Sandiganbayan.###
MGA ISYU AT IBA PA...
Biyernes, Hulyo 7, 2023
MGA BARANGAY SA QC MANDATORY NA PINAPADALO SA MGA SEMINAR AT PAGSASANAY LABAN SA KALAMIDAD
Ni: Rjhay E. Laurea
Imbak na larawan ng isang barangay na naghahanda sa paparating na bagyo.
KINAKAILANGAN umanong handa ang mga kawani ng barangay sa mga kalamidad na maaaring maranasan ng Lungsod Quezon lalo pa't nitong mga nakaraang buwan at linggo ay madalas ang pagkakaroon ng lindol at bagyo sa ating bansa.
​
Ito ang punto ng ipinasang ordinansa kamakailan ng Sangguniang Panlungsod ng Quezon kung saan isinasaad na mandatory na ang pagpapadala nito ng kinatawan sa mga seminar laban sa kalamidad at pagsasanay ng mga mapipiling kawani para sa operasyon ng pagliligtas at paghahanda.
​
Sina Konsehal Charm Ferrer ng Unang Distrito at Konsehal Vic Bernardo ng Ikaanim na Distrito ang mga pawang nagsulong ng ordinansa at iginiit nila na ang sunod-sunod na pagkakaroon ng mga lindol at bagyo sa ating bansa ay nakakaalarma at isa itong panggising sa ating lokal na pamahalaan na maging handa at may sapat na kasangkapan sa anumang oras na may maganap na kalamidad.
​
"The barangays, as early as now, shall be given serious attention by regularly allowing or requiring their personnel to undergo mandatory training in rescue operations and disaster preparedness considering that the barangays are the first responders in case the earthquake or natural calamity occurs," paliwanag pa ng dalawang konsehal sa kanilang ordinansa.
​
Sinuportahan din ng iba pang mga konsehal ang isinusulong na ito nina Ferrer at Bernardo. Sa katunayan, karamihan sa kanila ay naging co-introducers pa ng nabanggit na ordinansa na nilagdaan naman ni Konsehal Bernard Herrera (Unang Distrito) na nagsisilbi noong acting vice mayor at inaprubahan naman ni Vice Mayor Gian Sotto na siyang acting mayor nang ipasa ang ordinansa.
​
Ayon pa kina Ferrer at Bernardo, krusyal ang kahalagahan ng mga kawani ng barangay sa pamamahagi ng ayuda, gayundin, ang mga opisyal ng barangay bilang katuwang sa paghahanda, pagresponde at pagbangon kapag may kalamidad.
​
Polisiya rin umano ng Lungsod Quezon na tiyakin na may tamang representasyon ang mga barangay sa paglaban sa kalamidad, lalo na sa pagpapalit ng klima o climate change.
​
Alinsunod sa ordinansa, ang Quezon City Disaster Risk Reduction Management Office (QCDRRMO) ay magsasagawa ng Disaster Risk Seminar para sa mga barangay personnel para sanayin ang mga ito sa aktuwal na pagliligtas at paghahanda laban sa kalamidad.
Ang punong barangay naman ang magtatalaga ng mga kawani na dadalo sa nasabing seminar partikular ang mga nabibilang sa Barangay Disaster Risk Reduction Management Council (BDRRMC) o sinumang kawani na ang trabaho ay may kaugnayan sa rescue and relief operations.###
RIVERA NANUMPA BILANG BAGONG HEPE NG BJMP
Ni: Khryzz Daynata
PORMAL nang nanumpa bilang bagong hepe ng Bureau of Jail Management and Penology (BJMP) si Jail Director Ruel Rivera nitong Miyerkules.
​
Pinangunahan ni Department of Interior and Local Government (DILG) Secretary Benjamin Abalos ang paglalagay ng two-star ranks sa bagong Jail Director sa isang simpleng seremonya na ginanap sa DILG-NAPOLCOM building sa Quezon City.
​
Sa kanyang talumpati, sinabi ni Abalos na buo ang kanyang tiwala sa pamumuno ni Rivera.
​
Aniya, si General Rivera ang nagsilbing tulay upang maiugnay ang nakaraan at kasalukuyang administrasyon. Inaasahan ding ipapagpatuloy ng heneral ang kahusayan sa serbisyo.
​
“General Rivera has become the bridge that connects the previous and recent administrations. He is the continuity of excellence in service,” pahayag ni Abalos.
​
“Without any doubt, I am sure that he will continue to blaze the trail for the Bureau to become better,” dagdag ng opisyal.
​
Si Rivera ay itinalaga ni Pangulong Ferdinand Marcos Jr., bilang ika-10 hepe ng BJMP epektibo nitong June 25, 2023 kapalit ng nagretirong si Jail Dorector Allan Iral.
​
Nangako naman si Rivera na ipapagpatuloy nito ang pagsusulong sa J.A.I.L. Plan 2040 ng BJMP at susuportahan ang “Buhay Ingatan, Droga’y Ayawan” (BIDA) Program ng DILG at Philippine Development Plan 2023-2028 ng Marcos administration.
​
Nangako din siyang isusulong ang mandato ng BJMP na magbibigay ng ligtas at maayos na pasibilidad ng kulungan sa buong bansa.
​
Pamumunuan ni Rivera ang 20,813 tauhannng BJMP at pangangalagaan ang kapakanan ng 126,606 na persons deprived of liberty (PDL) sa 479 na kulungan sa buong bansa. ###
MGA ISYU AT IBA PA...
Lunes, Hunyo 26, 2023
PH handa na ba sa rito?
Pagpasa ng SOGIESC Bill,
Tunay na Layon ng mga Pride March
Ni: Rjhay E. Laurea
Mga larawan mula sa QC Government
MAY dalawang dekada na ring nakabinbin sa Kongreso at Senado ang pagpasa ng Sexual Orientation, Gender Identity, Gender Expression or Sex Characteristics (SOGIESC) Equality Bill na isang uri ng batas na nagsusulong ng paglaban sa diskriminasyon anuman ang sekswalidad ng isang mamamayan.
​
Sa kultura at tradisyon ng isang bansang tulad ng Pilipinas na karamihan ay mga Kristiyanong Katoliko, tila isang butas ng karayom ang dinadaanan ng SOGIESC Equality Bill na hindi maipasa-pasa sa kabila ng patuloy na lumalakas na panawagan na maipasa na ito.
​
Maging ang Pangulong Fedinand "Bongbong" Marcos, Jr., at Bise Presidente Sara Z. Duterte ay nagpahayag ng suporta sa LGBTQIA+ community sa laban na ito.
​
"Mahalaga na patuloy ang pagsuporta, pagrespeto at pagkilala sa kanilang (LGBTQIA+ sector) mahalagang ginagampanang bahagi sa ating lipunan. Ang kanilang 'di matatawarang kontribusyon sa iba't ibang larangan, nakikipagsabayan sa kaninuman, ang mga responsible at walang kapagurang tagapagtaguyod ng kanilang pamilya at tahanan. Palakpakan natin sila at ipagmalaki dahil sa kanilang pagsasabuhay ng husay at galing nating mga Pilipino," ayon kay Pangulong Marcos.
​
"Sa bagong Pilipinas, ang Pilipino ay malaya, sa bagong Pilipinas ang Pilipino ay malawak ang isipan at malaya sa diskriminasyon o pagkutya, 'yan ang mensaheng patuloy nating paiigtingin," pangako pa ng Pangulo.
Mga larawan mula sa Office of the Vice President Sara Duterte
Samantala, todo naman ang suporta ni Vice President Duterte na maipasa na ang SOGIESC Bill, na nagsabi pang: "Good things takes time. But we have advocates in the government, kasama na ako, sa inyong paghahanap ng batas for protection. Let us continue to press on in our shared cause for gender equality and social imparments to avenues that will promote entrepreneurial collaborations."
​
Isang programang pangkabuhayan para sa LGBTQIA+ sector ang ipinatutupad ng Office of the Vice President (OVP) na tinaguriang Magnegosyo 'Ta 'Day na ayon sa Pangalawang Pangulo ay layong tulungan ang mga kabababayan nating LGBTQIA+ na maging matagumpay bilang isang negosyante.
​
"As socio-economic disparities across genders continue to rise, we believe in the importance of expanding the capacities of the sector. Thereby, instituting programs that will not only narrow the economic gaps among genders, but will also help them contribute to the overall growth of their respective industries. I want you to succeed and to grow. Dahil ang tagumpay ng inyong negosyo ay magiging tagumpay ng inyong pamilya, at magiging tagumpay ng inyong mga komunidad," dagdag pa ni VP Duterte.
Mga larawan mula sa QC Government
Samantala, bukod sa pag-host ng pinakamatagumpay at pinakamalaking Pride March kung saan umabot sa 110,752 ang nakilahok, ipinamalas naman ng Lungsod Quezon ang mariin nitong pagsuporta sa LGBTQIA+ community at pagpapahalaga sa mga queer couples sa siyudad sa pamamagitan ng paglulunsad ng Right to Care Card na magbibigay ng karapatan sa mag-asawang LGBTQIA+ na magdesisyon para sa kani-kanilang partners pagdating sa usaping medikal.
​
"May mga ulat sa atin na ilang miyembro ng LGBTQIA+ community ang pinagbabawalan na magdesisyon kapag ang partners nila ay nasa krusyal na kalagayan at kinakailangang ma-admit sa mga intensive care units ng mga ospital," sabi ni Belmonte.
​
"Nais naming lahat ng residente, anuman ang kanilang oryentasyong seksuwal, ay mabigyan ng pagkakataon na makasama ang kanilang mga katuwang sa buhay sa mga kritikal na pagkakataon tulad ng pagkakaospital. Gumagawa kami ng isang mahalagang hakbang para tiyakin sa rainbow community na pinangangalagaan namin sila, kinikilala at pinahahalagahan sa Quezon City," dagdag pa ni Belmonte.
​
Si Belmonte ay matagal nang katuwang ng LGBTQIA+ community sa pagsusulong ng batas na magbibigay ng pagkakapantay-pantay ng mga mamamayan anuman ang seksuwal na oryentasyon at pagkakakilanlan nito. Aniya, patuloy nilang susuportahan ang Pride March hanggang sa maipasa ang SOGIESC Bill.
​
"Well, we want to celebrate them, we honor them, we recognized them, and of course we also want to provide a venue for them to speak out kasi marami pang kailangan magawa at mangyari para magkaroon ng tunay na gender equality para sa LGBTQIA+ sector," ayon pa sa alkalde.
​
Bukod sa Lungsod Quezon, nagsagawa rin ng hiwalay na mga Pride March ang iba pang lungsod sa Metro Manila at sa iba pang bahagi ng bansa kabilang na ang Makati; Pasig; Baguio; Cagayan de Oro; Quirino; San Mateo, Rizal; at Cebu. Mayroon ding mga Pride March na ginanap o gaganapin pa lang Zamboanga; Romblon; at General Santos City. May LGBTQIA+ mass wedding din na naganap sa Quezon City na inorganisa ng LGBTS Christian Church at may nakatakda ring ganapin sa Subic, Zambales.
"Ginagawa ang mass wedding natin sa LGBTS Christian Church for social awareness na ito marami nang kinakasal tapos hanggang ngayon wala pa rin tayong batas na nagpoprotekta (sa LGBTQIA+ couples). Ito rin ay panawagan na magkaroon na ng civil union partnership sa Pilipinas na magpoprotekta para sa LGBTQIA+ couples," paliwanag ni LGBTS Christian Church head pastor Rev. Cresencio Agbayani, Jr.
​
Naniniwala ang LGBTS Christian Church na may maling interpretasyon ang mga naunang Simbahang Kristiyano sa kung ano talaga ang katuruan ng Banal na Bibliya patungkol sa LGBTQIA+ individuals na siyang pangunahing dahilan bakit naitatag ang kanilang simbahan.
​
Kung ang Commission on Human Rights (CHR) ang tatanungin, dapat nang maipasa ang SOGIESC Bill. Anila, ang consolidated bill na inaprubahan ng House Committee on Women and Gender Equality ay mainam nang unang hakbang para sa umusad ito.
​
"The approval of the newly-revised SOGIESC Equality Bill is a commendable step forward," ayon sa CHR. “In observance of the Pride Month, we hope to see concrete and serious strides in advancing the plight of the LGBTQIA+ sector through the swift progress of the equality bill,” dagdag pa ng Komisyon.
​
Ayon sa CHR hanggat walang kongkretong batas na magpoprotekta sa LGBTQIA+ laban sa diskriminasyon, mananatiling bulnerable ang sektor sa anumang uri ng pang-aabuso at pagkutya.
​
Matatandaan na inaprubahan kamakailan ng House Committee on Women and Gender Equality ang SOGIESC Bill matapos na pakinggan ang posisyon ng mga tumututol na evangelical groups at mga organisasyong sumusuporta naman sa pagpasa nito.
​
Paniniwalang pangrelihiyon pa rin ang pangunahing humaharang sa pagpasa ng SOGIESC Bill kahit na ang nasabing panukalang batas ay hindi naman patungkol sa same-sex marriage na siyang tinututulan ng mga konserbatibong simbahan at sa kabila ng nakasaad sa Saligang Batas na may "paghihiwalay ang simbahan at ang estado."###
MGA ISYU AT IBA PA...
Biyernes, Hunyo 23, 2023
QC PRIDE FESTIVAL PATULOY NA MAG-IINGAY HANGGANG SA MAIPASA BILANG BATAS ANG SOGIE BILL
Nina: Rjhay E. Laurea at Junn Sta. Maria
"MAG-INGAY tayo hanggang marinig ng mga nasa Batasan (Pambansa) ang kahilingan ng taumbayan!"
​
Ito ang mensaheng ipinaabot ni Quezon City Mayor Joy Belmonte sa isinagawang pulong-balitaan kamakailan hinggil sa isasagawang QC Pride Festival bukas (Hunyo 24) sa Quezon Memorial Circle (QMC) bilang bahagi ng pagdiriwang ng Pride Month ngayong Hunyo.
​
Ayon kay Mela Habijan, lider ng grupong Pride PH na katuwang ng Lungsod Quezon sa pag-organisa ng QC Pride Festival, ang pagdiriwang na ito ay hindi lamang isang selebrasyon kundi isang uri pa rin ng mapayapang pagprotesta para maipasa na bilang batas sa Kongreso at Senado ang Sexual Orientation, Gender Identity and Expression (SOGIE) Bill na nagtatakda ng pagkakapantay-pantay ng karapatang pantao ng lahat kahit ano pa ang seksuwalidad ng mga ito.
​
Nagpahayag din ng pagkasabik sa isasagawang aktibidad ang lahat ng mga organizer at member ng core team ng Pride PH. Anila, magkakaroon ng tatlong bahagi ang festival na kinabibilangan ng Pride Expo, Pride March, at Pride Night. Inaasahan din nila na mula sa 25,000 na nagsidalo noong nakaraang taon ay mapaabot nila ang lalahok ngayong 2023 sa 50,000.
​
"Nais namin na mapanatili ang parehong format noong nakaraang taon, pero siyempre, magiging mas malaki at mas maganda ito. Gusto rin namin na magkaroon ng mga solidarity speeches sa buong araw para mas umingay pa ang panawagan ng komunidad para sa pagkakapantay-pantay at pagkilala na rin sa aming mga karapatan. Bago naman kasi ang lahat, ang Pride (Festival) ay isa pa ring protesta," sabi ni Rod Singh, direktor ng QC Pride Festival Program.
​
Magbubukas ang Pride Festival ng 10:00 ng umaga para magbigay ng daan para sa mga negosyanteng LGBTQIA+, NGO partners, at iba pang katuwang na korporasyon na ipakita ang kanilang mga produkto at serbisyo sa mga magsisidalo.
​
"Pagsapit ng ikatlo ng hapon, umaasa kaming makakapagmartsa nang matiwasay sa nakatakdang ruta na dadaanan at tapusin ang araw sa pamamagitan ng isang Pride show na magsisimula ng ika-6:00 ng gabi. Asahan na maraming sayawan at magagandang musika mula sa mga talentadong queer performers at artists," dagdag pa ni Singh.
​
Ibinigay naman ng QC Government ang kanilang buong suporta sa aktibidad kung saan tinitiyak ng lokal na pamahalaan ang kaligtasan at seguridad ng lugar para matagumpay na maipagdiwang ang Pride Festival.
​
"Ang Lungsod Quezon ay isang inklusibong siyudad at kakampi kami ng LGBTQIA+ community. Tinitiyak namin sa mga lalahok na ang Pride event ngayong taon ay magiging masaya, hindi malilimutan, at makahulugan para sa lahat," dagdag na pahayag ni Mayor Belmonte.
Aniya, maging ang kanyang administrasyon sa kabuuan ay nagsusulong at nagpapatupad ng mga polisiya para sa pagkakaroon ng pantay na karapatan ng mga heterosexuals at ng LGBTQIA+. Kabilang na rito ang pagtiyak na nasusunod ng mga negosyo at establisimiyento ang mga patakaran lalo na sa paglalaan ng hiwalay na palikuran para sa mga LGBTQIA+.
​
Sinabi ni Business Permits and Licensing Department (BPLD) head Margarita Santos na mahigpit ang pag-iinspeksiyon nila sa mga negosyo at establisimiyento na dapat ay nakakasunod sa pamantayan ng ordinansa ng lungsod bago ito mabigyan ng permiso na mag-operate.
​
Si Department of Public Order and Safety (DPOS) head at dating QC Police District (QCPD) director Elmo San Diego naman ay ikinuwento ang karanasan niya nang magtrabaho sa kanya ang transgender cop na si P/Major Rene Balmaceda na kasalukuyang head ng Women's and Children's Desk ng QCPD.
​
Habang tiniyak naman ni District 6 Councilor Doc Ellie Juan, ang chairperson ng committee on women and children and gender equality na patuloy na magpapasa ng mga resolusyon at ordinansa ang Konseho ng Lungsod Quezon para maisulong ang pagkakapantay-pantay ng lahat at mawala na ang diskriminasyon.
​
Samantala, higit sa 10 Pride March ang naganap ang magaganap sa buong Pride Month. Maliban sa Pride Festival sa Lungsod Quezon bukas, magkakaroon din ng hiwalay na pagdiriwang sa Makati, Baguio, Quirino, Cagayan de Oro, at Cebu. Magkakaroon din ng mga regional march sa mga siyudad ng Zamboanga, Romblon at General Santos City hanggang sa katapusan ng buwan.
​
Ikinatuwa naman ni Mayor Belmonte ang pagdami ng mga alkalde na sumusuporta sa LGBTQIA+ community na umabot na sa 43 mayors ang may partnership na sa ilang mga NGOs at nagbibigay ng edukasyon hinggil sa SOGIE. Masaya rin siya na ang pangulo ng League of Cities na si Mayor Michael Rama ay matibay din ang suporta sa nasabing sektor.###
MGA ISYU AT IBA PA...
Biyernes, Hunyo 16, 2023
PAGDIRIWANG NG PRIDE MONTH BILANG PAGBALIKWAS SA KULTURA NG DISKRIMINASYON AT PAMBUBUSKA
Ni: Patrick Garin
Si Quezon City Mayor Joy Belmonte kasama ang ilang miyemrbo at leaders ng LGBTQIA+ noong 2022 Pride PH Festival
Walang limitasyon ang pagmamahal, kahit pa kasarian. Maaaring hingin ninuman ang kamay ng sinumang kanyang mapusuan ano man ang kasarian. Lalong walang puwang ang diskriminasyon at pagyurak sa karapatan ng iba dahil sa kanyang oryentasyong seksuwal.
​
Ipagdiriwang muli sa darating na ika-24 ng Hunyo ang Pride PH’s Pride Festival na may temang "Love, Laban: A Celebration of the Fight for Love in All Forms and Ways". Pangungunahan ng Lungsod ng Quezon ang pag-host para sa nasabing pagdiriwang na gaganapin sa Quezon Memorial Circle. Nakatutuwang patuloy pa rin ang pakikibaka para sa kanilang karapatan ang mga miyembro ng LQBTQIA+. Sa tulong ng mga taong bukas ang isipan, balang araw ay makakamit din ang kapayapaan.
​
Pinapanindigan ng QC ang pangako nitong gawing "City of Inclusivity" ang kanilang lungsod sa pamamagitan ng pagbibigay suporta sa pakikipaglaban ng mga LGBTQIA+. Ibig sabihin nito, bukas ang siyudad para sa lahat ng sektor maging sa mga LGBTQIA+. Nagpahayag ng buong suporta si Mayor Joy Belmonte sa Pride PH at sa Pride Festival. Suportang higit na kinakailangan ng mga miyembro ng nasabing samahan sa mga panahong pinupukol sila ng pagsubok na dala rin ng mga taong sarado pa rin ang isipan at hindi matanggap ang katotohanan ng buhay.
​
Nagpapasalamat naman si Mela Habijan, Miss Trans Global 2020 at lead convener ng Pride PH sa lokal na pamahalaan ng Quezon City bilang isa sa pinakamalaking kaalyado ng LGBTQIA+ community. "Ito ang ikalawang taon na tinanggap tayo ng lokal na pamahalaan ng Quezon City sa kanilang tahanan. At kami ay pinagpala na magkaroon ng suporta ni Mayor Joy, na naging consistent na tunay na kaalyado ng komunidad mula pa noong unang araw,”aniya.
​
Malinaw na bukas ang tahanan ng QC para sa mga miyembro ng nasabing samahan. Mabuti dahil kailangan ng mga LGBTQIA+ community ng kakampi sa panahong nilulubog sila ng karamihan. Isa sa pinakamalawak na network ng LGBTQIA+ na mga indibidwal at organisasyon ang Pride PH na siyang organizer ng QC Pride Festival. Ang Pride Festival ay isang isang araw na kaganapan na pagdiriwang ng mga miyembro ng LGBTQIA+ sa pamamagitan ng mga pangunahing aktibidad. Nahahati sa tatlong klase ang mga aktibidad na ito. Nariyan ang Pride Expo, Pride March, at Pride Night.
​
Ang Pride Month ay isang buwang pagdiriwang na kumikilala sa LGBTQ+ community at sa kanilang mga kontribusyon sa lipunan. Panahon na para kilalanin ang mga hamon na kinakaharap ng komunidad na ito at tumayo sa pagkakaisa sa kanilang paglaban para sa pagkakapantay-pantay, pagtanggap, at karapatang pantao. Ang Pride Month ay isang masaya at makulay na pagpapakita ng pagmamahal, pagkakaisa, at katatagan, na may mga kaganapan at aktibidad na nagsusulong ng pagiging inklusibo, nagtuturo sa publiko, at nagdiriwang ng pagkakaiba-iba ng mga oryentasyong sekswal at pagkakakilanlang pangkasarian.
​
Tradisyonal na ipinagdiriwang ang Pride Monrh tuwing Hunyo sa buong mundo, kabilang ang United Kingdom. Ngayong taon, magaganap ang Pride Month mula Hunyo 1 hanggang Hunyo 30. Ang pinahabang panahon na ito ay nagbibigay-daan para sa malawak na hanay ng mga kaganapan, parada, martsa, at talakayan na magaganap, na nagbibigay ng mga pagkakataon para sa mga LGBTQIA+ na indibidwal at kanilang mga kaalyado na magsama-sama at iparinig ang kanilang mga boses.
​
“Higit pa sa isang pagdiriwang, ang Pride Festival ay isang panawagan para wakasan ang diskriminasyon, poot at pagtatangi sa mga miyembro ng LGBTQIA+. Isinasagawa namin ang aktibidad na ito hindi dahil ang sektor na ito ay naghahanap ng espesyal na paggamot. Sa halip, ang inaasam-asam nila ay simpleng paghinto sa hindi nararapat na masamang pagtrato at pagtanggi sa mga pagkakataong patuloy nilang dinaranas," sabi ni Mayor Belmonte.
​
Ngayong taon mayroong higit sa sampung Pride marches na nagaganap sa buong Pride Month. Bukod sa QC Pride Festival sa Hunyo 24, ilang selebrasyon ng Pride ang sabay-sabay na magaganap sa parehong araw sa Makati, Baguio, Quirino, Cagayan De Oro, at Cebu. Magpapatuloy din ang Regional Pride Marches sa iba't ibang lungsod tulad ng Zamboanga, Romblon, at General Santos City hanggang sa katapusan ng buwan. Ang Pride PH Festival ay maaari ding matunghayan sa pamamagitan ng iba't ibang online at streaming channels. Ipapalabas ito nang live sa pamamagitan ng Facebook page ng Pride PH, opisyal na Facebook page ng Pamahalaang Lungsod ng Quezon at sa pamamagitan ng digital platforms ng mga opisyal nitong media partners, ABS-CBN, iWantTFC at Myx.
​
Isang aktibidad din ang isinagawa ng Tanggapan ni Vice President Sara Duterte sa Lungsod kung saan ibinida niya sa ilang leaders ng LGBTQIA+ ang mga programa ng kanyang opisina para sa kabilang sa nasabing sektor.
​
"Ang pagmamataas ay nakikita bilang mga ligtas na espasyo na nagbibigay ng isang lugar upang itulak ang pagkakapantay-pantay at pagiging kasama. At habang ang mga pagdiriwang na ito ay nananatiling pagdiriwang, ang Pride ay isang protesta pa rin at dapat na manatiling ganoon. Hanggang sa hindi na kailangan ng LGBTQIA+ community na ipaglaban ang kanilang mga karapatang pantao, ang kanilang karapatang magmahal, at ang kalayaan na maging tunay na tunay na sarili nila,” dagdag ni Habijan.
​
Magpapatuloy ang pakikibaka ng mga miyembro ng LGBTQIA+ hanggang hindi nila nakakamit ang nararapat para sa kanila. Dahil hanggat marami pa ang nangmamata sa kanila, hindi ganap na makakalaya ang mga ito mula sa panghuhusga't pananakit ng masa. Tapos na ang pagsasawalang bahala at hindi pagkimi. Sapagkat nahanap na ng mga inaabuso ang boses na sisigaw para sa kalayaan nila.###
MGA ISYU AT IBA PA...
Miyerkules, Hunyo 14, 2023
'EAT BULAGA', SINO NGA BA ANG TUNAY NA MAY-ARI?
Ni: Khryzz Daynata
"Eat Bulaga!", tunay ngang mula Batanes hanggang Jolo, nakakatatak na sa bawat isang pamilyang Pilipino ang tuwa at saya pinakamatagal na noontime show sa bansa na pinagbibidahan nina Tito,Vic at Joey o TVJ na pinamahalaan naman ng Television and Production Exponent (TAPE) Incorporated.
​
Mayo 31, 2023, binulaga ang bansa ng isang napakalungkot na balita, inanunsyo ng TVJ ang kanilang pagpapaalam bilang hosts ng programa na nasundan ng pagbibitiw ng lahat ng iba pang mga co-hosts. Ang dahilan? Matinding hindi pagkakaunawaan sa pagitan ng TVJ at ng TAPE Incorporated.
​
Sa pamamaalam at pag-alis ng TVJ sa "Eat Bulaga" at sa GMA network, bitbit nila ang simpatya at tiwala ng mamamayang Pilipino. Bakit nga ba hindi, e naging tatak na sa sambayanan ang tuwa at sayang dala ng programa sa pananghalian at sa tuwing mababanggit ang "Eat Bulaga", palagi nang kasunod ang Tito,Vic at Joey at mga Dabarkads.
​
Kung babalikan natin ang kasaysayan, taong 1979 ay naisip ni Joey de Leon ang titulong "Eat Bulaga" at July 7, 1981 naman ay nabuo at pinamahalaan ito ng TAPE Incorporated.
​
Ayon kay Atty. Ranny Randolf B. Libayan, walang pananagutan ang TAPE Incorporated sa TVJ dahil wala naman legal na kontrata na pinirmahan ang mga ito. Sa paghihiwalay ng landas ng TVJ at TAPE Incorporated, matapos ang mahigit 40 taon ay naging mainit ang usapin kung sino ang tunay na may-ari ng titulo ng programa.
​
Bagamat naghiwalay ng landas, nagpatuloy sa pag-ere ang "Eat Bulaga" sa GMA7 sa pamumuno ng TAPE kung saan mga bagong hosts din ang nagpasaya sa mga manonood. Ilang araw lang ay inanunsyo ng TVJ ang pagbabalik ng kanilang programa sa kanilang bagong tahanan, ang TV5.
​
Gayunman, nanatiling pinag-aagawan ng dalawang kampo ang titulo o trade mark na "Eat Bulaga". Sa usapin kung sino ang tunay na may-ari ng "Eat Bulaga", mahalagang malaman ang kaibahan ng trademark at copyright.
​
Ayon sa batas, ang trademark ay tumutukoy sa pangalan, brand o logo ng isang produkto o serbisyo habang ang copyright ay isang intellectual property na ginawa upang maprotektahan ang may likha ng isang likhang pangliteratura, computer, software, musika, pelikula, at programa sa telebisyon.
​
Batay sa talaan ng Intellectual Property Rights of the Philippines, ang trademark ng "Eat Bulaga" ay pag-aari ng TAPE hanggang Hunyo 14, 2023 sa ilalim ng kategoryang "merchandise" o isang pisikal na produkto. Ang production company ay pag-aari ni Romeo Jalosjos Sr.
​
Pebrero 27, 2023 ay nag-apply ang TVJ at si Antonio Tubiera ng trademark ng brand sa Intellectual Property Office of the Philippines (IPOPHL) sa ilalim ng kategoryang "entertainment" dahil ang "Eat Bulaga" ay isang programa sa telebisyon. Ang naturang aplikasyon ay nanatiling pinag-aaralan ng IPOPHL.
​
Sa ngayon, nasa kamay ng IPOPHL kung aaprubahan nito ang aplikasyon ng TVJ. Sa ilalim ng batas, ang unang nag-file ng registration para sa trademark ang siyang kikilalanin ng batas pero iyon ay kung nasa iisang kategorya lamang ang aplikasyon.
​
Napag-alaman na ang pagre-review sa application ng trade mark ay tumatagal ng hanggang anim na buwan sa IPOPHL. At pagtapos ng pagbusisi na ito sa aplikasyon ng TVJ, dito pa lang natin malalaman kung sino ang kikilalanin ng batas na tunay na may-ari at maaaring gumamit ng pamagat na "Eat Bulaga" sa kanilang programa.###
MGA ISYU AT IBA PA...
Lunes, Hunyo 5, 2023
2 sa 10 navigational buoys na nilagay ng 'Pinas sa WPS, nawawala
Ni: Khryzz Daynata
PATULOY ang pag-angkin ng China sa West Philippine Sea (WPS) sa kabila ng inilabas na desisyon ng arbitral court noong 2016 na nagpapawalang bisa sa iginigiit na kasa sa nine-dash line ng dayuhang bansa ang mga lugar na nasasakop na ng teritoryo o exclusive economic zone (EEZ) ng Pilipinas.
​
Patunay rito ang kumpol-kumpol na barko na pag-aari ng China na nasa paligid ng pinag-aagawang mga isla sa WPS. Kaugnay nito, nakatanggap din ng ulat ang Philippine Coast Guard (PCG), dalawa sa 10 navigational buoys na inilagay ng bansa sa WPS ay nawawala.
​
Ang ulat ay kasunod ng paglalagay din ng tatlong buoys ng Beijing sa katubigang sakop ng Pilipinas partikular na sa Balagtas o Irving Reed, Julian Felipe o Whitsun Reef at Burgos o Gaven Reef.
​
Sinabi ni Rear Adm. Armando Balilo na nakatanggap sila ng ulat na ang buoys na nilagay sa Balagtas at Julian Felipe ay nawawala. Aniya, sa ngayon ay inaalam pa kung may katotohanan nga ang ulat hinggil sa mga nawawalang marker.
​
“Sa ngayon ang ulat na nakakarating sa amin ay intact pa naman sila,” pahayag ni Balilo. Una nang sinabi ni Balilo na mahihirapan ang mga awtoridad na alamin kung may nawawala ngang marker o buoys sa paligid ng WPS dahil sa masamang lagay ng panahon.
Sinabi ng opisyal na tiyak silang ang walong buoys ay naroroon pa rin sa lugar kung saan nila ito nilagay habang ang dalawang naiulat na nawawala ay kailangan pa nilang makumpirma. Sa sandaling mapatunayan na nawawala nga ang mga buoys ay titiyakin nilang malalaman ito ng National Task Force on the West Philippine Sea at Department of Foreign Affairs.
​
Matatandaang sa kalagitnaan ng Mayo ay naglagay ng limang buoys ang PCG sa mga itinuturing na critical areas sa WPS. Ang mga buoys na may watawat ng Pilipinas ay inilagay sa katubigan ng Patag Island, Balagtas Reef, Kota Island, Panata Island at Julian Felipe Reef.
​
Naglagay din ng buoys sa Lawak Island, Likas Island, Parola Island, at Pagasa Iland noong nakaraang taon. ###
This is your About Page. This space is a great opportunity to give a full background on who you are, what you do and what your website has to offer. Double click on the text box to start editing your content and make sure to add all the relevant details you want site visitors to know.
MGA ISYU AT IBA PA...
Miyerkules, Mayo 31, 2023
TAGUIG TUMULONG SA PAGSAGIP SA MGA MENOR DE EDAD NA BIKTIMA NG HUMAN TRAFFICKING
Ni: Alfredo Patriarca, Jr.
TUMULONG kamakailan ang Pamahalaang Lungsod ng Taguig sa pagsagip sa 12 menor de edad na biktima ng human trafficking at online na sekswal na pang-aabuso.
​
Dahil sa pinaigting na kampanya ng Taguig laban sa mga krimen laban sa mga bata, nailigtas ng mga awtoridad ang 12 menor de edad, 11 dito ay biktima ng human trafficking at online sexual abuse, sa tatlong kamakailang operasyon sa lungsod.
​
Sa 12, ang apat na menor de edad na kinabibilangan ng isang 5-buwang gulang na sanggol, 3-taong-gulang na lalaki, isang 13-taong-gulang na babae, at isang 14-taong-gulang na lalaki, ay nailigtas noong Mayo 25. Arestado sa pagsagip sa mga menor de edad na magkakapatid ang ina ng mga ito.
​
Ayon sa City Social Welfare Development Office (Panlungsod na Tanggapan ng Kagalingan at Pagpapaunlad Panlipunan) ng Taguig (CSWDO-Taguig), na tumulong sa National Bureau of Investigation (Pambansang Kawanihan ng Pagsisiyasat) sa operasyon ng pagliligtas, nasa kustodiya ng NBI ang ina at nahaharap sa mga kasong paglabag sa Anti-Online Sexual Abuse o Exploitation of Children law (batas sa Pagbabawal ng Online na Seksuwal na Pang-aabuso at Pagsasamantala sa mga Bata), at sa batas sa Pag-iwas sa Cybercrime, at sa iligal na pagkalakal sa tao.
​
Dalawang linggo bago pa lumabas ang ulat na ito, noong Mayo 10, nailigtas ng CSWDO-Taguig at ng Philippine National Police Children Protection Center (Sentro sa Proteksyong Pangbata ng Pambansang Pulisya ng Pilipinas) sa Camp Crame (Kampo Krame) ang isa pang pangkat ng apat na menor de edad na kinabibilangan ng isang babae at tatlong lalaki.
​
Ang pagsagip ay sa tulong ng ulat mula sa Pederal na Pulisya ng Australya (Australian Federal Police), na umano'y isang Australyano ang sangkot sa online na sekswal na pang-aabuso at pagsasamantala ng mga menor de edad.
​
Noong Mayo 5, isa pang grupo ng apat na menor de edad na kinabibilangan ng isang 16-anyos na lalaki, isang 15-anyos na babae, at dalawang 13-anyos na babae ang nailigtas sa tulong ng Taguig Police Substation-4, ang Inter-Agency Committee ng Department of Justice Against Trafficking (Komite ng Pinagsama-samang Ahensiya ng Kagawaran ng Katarungan Laban sa Iligal ng Pagkalakal ng Tao), the Philippines Against Child Trafficking (Pilipinas Laban sa Pagkalakal ng Bata), at ang Department of Social Welfare and Development-National Capital Region (Kagawaran ng Kagalingan at Pagpapaunlad Panlipunan ng Rehiyon ng Pambansang Kapitolyo).
​
Sinabi ng CSWDO-Taguig na sumailalim sa atensiyong medikal at mental ang mga nasagip na menor de edad. Papadaliin din ng lungsod ang pag-endroso ng mga nakaligtas na biktima sa kanlungan ng mga bata para sa pangmatagalang interbensyon.
​
Laging binibigyang-diin ni Mayor Lani Cayetano ang pangangailangang itaguyod ang karapatan ng mga bata. Inulit niya ang kanyang pangako sa proteksyon ng bata sa pamamagitan ng kanyang maraming programa na higit pa sa pagtiyak sa kaligtasan at seguridad ng kabataan.
​
"Lahat ng uri ng pang-aabuso sa bata ay ganap na walang puwang sa alinmang lipunan. Walang sinuman ang may karapatang ipagkait sa ating mga anak ang magandang kinabukasan na nasa harapan nila. Sa Taguig, patuloy nating gagawin ang lahat ng ating makakaya upang protektahan ang mga kabataan mula sa mga kriminal na elemento. Makatitiyak na sila ay patuloy na lalago sa isang ligtas na kapaligiran na nagpapahintulot sa kanila na umunlad bilang mga indibidwal at tao," sabi ni Mayor Lani Cayetano. Upang mag-ulat ng mga kaso na kinasasangkutan ng mga bata sa Taguig, tumawag sa hotline ng CSWDO sa 0932-2724-888. ###
Erwin Tulfo nanumpa bilang
bagong miyembro ng Kongreso
Nina: Rjhay E. Laurea at Alfredo Patriarca, Jr.
PORMAL nang kasapi ng Mababang Kapulungan ng Kongreso si dating DSWD Secretary Erwin Tulfo matapos itong manumpa sa katungkulan kahapon, Mayo 30. Si Tulfo ang kahalili ni Jeffrey Soriano bilang ikatlong kinatawan ng party-list group na Anti-Crime and Terrorism Community Development Support (ACT-CIS) third nominee, alinsunod na rin sa Section 16 ng Republic Act No. 7491.
​
Pinasumpa si Tulfo matapos na maibasura ang petisyon na nagpapadiskuwalipika sa kanya noong Mayo 25, 2023. Ang dating mamamahayag ay siyang ikaapat na nominado ng party-list na awtomatikong papalit kay Soriano na binakante na ang posisyon.
​
Si House Majority Floor Leader Rep. Manuel Jose M. Dalipe ang nangasiwa ng panunumpa ni Tulfo. Pinasalamatan ng dating kalihim ang lahat ng mga nagtiwala sa kanya upang mabigyan ng pagkakataon na makapaglingkod bilang kinatawan ng mamamayan.
​
Ipinangako rin ni Tulfo na magtatrabaho siya nang walang kapagod pagod para isulong ang interes ng kanyang mga sektor na kinakatawan at makapag-ambag na rin sa agenda ng lehislatura ng Kongreso. Inaasahang maraming magagawa si Tulfo sa Kongreso lalo pa't dati siyang opisyal ng gobyerno.###
Sen. Pia Cayetano wagi ng
WHO 2023 World No Tobacco Day Award!
Nina: Rjhay E. Laurea at Alfredo Patriarca, Jr.
INULAN ng pagbati si Senator Pia Cayetano matapos na magawaran ng pagkilala mula sa World Health Organization (WHO) 2023 World No Tobacco Day Award! Bilang tagapagsulong ng pagkontrol sa tabako, matagumpay na pinangunahan ni Cayetano ang paggawa ng mga batas, programa at proyekto laban sa paninigarilyo, paggamit ng vape at iba pang maiinit na produkto ng tabako.
​
Noong 2014, inisponsoran ni Senator Pia Cayetano ang Graphic Health Warning bill na tuluyang naging batas alinsunod sa Republic Act 10643 at isa rin siya sa lumaban para maisabatas ang Sin Tax Reform Act of 2012 alinsunod sa Republic Act 10351.
​
Ang nasabing pagkilala, na iginagawad lamang sa mga indibiduwal o organisasyon na may mahalagang ambag sa pagkontrol ng tabako ay katibayan ng kanyang puso sa kalusugang pangpubliko at ang patuloy niyang pagsisikap na maging ligtas ang mga Pilipino sa mga produktong nakalalason.###