BALITANG KALINANGAN
Martes, Marso 12, 2024
OVP Nagbigay ng Wheelchair at Suction Machine sa Batang May Cerebral Palsy
Ni: Rjhay E. Laurea / Bidyo ng Tanggapan ng Pangulo (OVP)
PATULOY ang pagbibigay ng tulong medikal ng Tanggapan ng Pangalawang Pangulo Sara Z. Duterte (Office of the Vice President Sara Z. Duterte o OVP) sa mga kapus-palad nating mga kababayan upang kahit papaano'y matugunan ang kanillang mga pangagailangang medikal.
​
Ang limang taong gulang na si Baste ay isa lamang sa mga mapalad na benepisaryo ng programang ito. Bata pa lamang si Baste, ngunit dala na niya ang hirap na dulot ng sakit na Cerebral Palsy.ng Cerebral Palsy ay isang pisikal na kapansanan na sanhi ng pinsala sa utak na nakakaapekto sa paggalaw, koordinasyon, muscular tone at control, reflexes, posture, at balanse.
Dumulog ang ina ni Baste na si Kristine sa OVP sa hangaring maibsan ang hirap na dinaranas ng kanyang anak.
​
Sa pamamagitan ng OVP Eastern Satellite Office, nabigyan si Baste ng Wheelchair at Suction Machine na ginagamit ni Baste sa tuwing nahihirapan siya sa paghinga.
​
Isa lamang ang kwento ni Baste sa libu-libong kwento na natulungan ng OVP Medical Assistance sa buong Pilipinas.
​
Patuloy ang layunin ng OVP na matiyak na mapaglingkuran ang bawat Pilipino sa mga programa at proyekto ng ating Tanggapan saanmang sulok ng bansa.###
LIBONG KALALAKIHAN NANGAKO NA WAWAKASAN ANG KARAHASAN LABAN SA KABABAIHAN SA QC
Ni: Rjhay E. Laurea
KAUGNAY ng pagdiriwang ng Buwan ng Kababaihan (Women's Month), pinangunahan ng Lokal na Pamahalaan ng Lungsod Quezon (Quezon City Government) ang pangangako ng may 11,000 kalalakihang QCitizens bilang suporta sa Men Opposed to Violence Everywhere (MOVE) movement.
​
Pinangunahan ng Tanggapan ng Punong Lungsod (Office of the City Mayor) katuwang ang Gender and Development (GAD) Council Office, tinatayang nasa 4,000 lalaking kawani at opisyal ng Quezon City hall ang makikiisa sa MOVE ngayong araw (Marso 12).
Nauna nang sumuporta sa MOVE ang 7,000 kawani at pulis ng QC Police District (QCPD), QC Fire District (QCFD), Bureau of Jail Management and Penology (BJMP), Civil Society Organizations (CSOs) at iba pang volunteers na dumalo sa pagtitipon sa Kampo Karingal noong Sabado (Marso 9).
​
Ang mass oath takings na ito ay dinaluhan nina District 5 Rep. PM Vargas, QC Police District Chief Brigadier General Redrico Maranan, QC Fire Department Chief FSSupt. Flor-Ian Guerrero, MOVE Vice Chairperson for Luzon Donald Amado, MOVE Secretary General Jonathan Pascual, City Councilors, District Action Officers, QC Department heads, at mga barangay officials.
Muling nilunsad noong 2022, ang QC MOVE ay isang kilusan na naglalayon na wakasan sa QC ang lahat ng uri ng diskriminasyon, karahasan at pang-aabuso laban sa kababaihan o VAW (violence against women).
​
Kilalang women's rights advocate, binigyang diin ni Mayor Joy Belmonte na ang kontribusyon ng parehong kababaihan at kalalakihan ang susi para magkaroon tayo ng matagumpay at ligtas sa VAW na siyudad.
​
“Ang Women's Month ay tungkol din sa mga kalalakihan. Women and men are partners and allies. Both men and women have to work together to make sure that gender equality is achieved,” sabi ni Mayor Belmonte.
​
Hinikayat naman ni QC MOVE honorary chair at Vice Mayor Gian Sotto na ibahagi sa siyudad ang kanilang mga bisyon para maisulong ang mga VAW-free na komunidad sa QC.
​
"Ang tunay na lalaki ay may paninindigan. Tungkulin nating mga lalaki na mai-angat at irespeto ang mga kababaihan. I encourage all the men to serve as a voice for the oppressed in their households and communities," pahayag ni Vice Mayor Sotto.
​
Sa mga susunod na araw dadalhin naman ng QC-GAD ang kampanyang ito sa mga paaralan sa pamamagitan ng pag-organisa ng Youth for MOVE, sa pakikipagtulungan na rin ng Division of City Schools at ng Education Affairs Unit (EAU).
​
Sa pamamagitan ng programa, magkakaroon ng pagkakataon ang mga kabataang kalalakihan na aktibong makilahok sa pag-iwas at pag-ulat ng mga karahasan sa paaralan kabilang na ang bullying.###
BALITANG KALINANGAN
Linggo, Marso 10, 2024
LIBRENG SAKAY NG OVP UMABOT NA SA MAHIGIT 1M ANG PASAHERO
Ni: Rjhay E. Laurea
MASAYANG ibinalita ng Tanggapan ng Pangalawang Pangulo Sara Z. Duterte (Office of the Vice President Sara Z. Duterte o OVP) na umabot na sa 1-milyon ang pasaherong nakinabang sa kanilang Libreng Sakay Program.
​
At ang mapalad na ika-1 milyon na pasahero na si Drew, 21 taong gulang ay nakatanggap naman ng regalo mula sa OVP.
​
"Malugod na pagbati para sa ating ika-1,000,000 na pasahero para sa Libreng Sakay program!" pagbati ng OVP kay Drew sa kanilang social media post.
​
Si Drew, 21 taong gulang, at residente ng Cubao, Quezon City ang makasaysayang Pilipino na naitala bilang ika-1,000,000 na pasahero ng OVP Libreng Sakay. Naispatan siya na sakay ng last trip ng OVP Bus sa EDSA Carousel nitong Marso 1.
​
Ang Libreng Sakay Program ng OVP ay naglalayon na tulungan ang commuting public sa pamamagitan ng pagbibigay ng karagdagang moda sa transportasyon.
​
Noong Marso 4, umabot na sa 1,003,968 ang kabuuang bilang ng pasahero na napagsilbihan ng OVP bus.
​
Mula 2022, nasa 7 bus na ang naghahandog ng Libreng Sakay sa buong Pilipinas — tig-1 bus sa Bacolod, Cebu at Davao, at 4 sa Metro Manila.
​
Hiling ng OVP na marami pang Plilipino ang matulungan ng ating mga programa saan mang sulok ng bansa.
​
"Ang ating determinasyon, pagpupunyagi, at pagsisikap ay nakatali sa hangarin na makapagsilbi pa sa ating mga kababayang Pilipino saan mang sulok ng bansa," ayon pa sa social media post ng OVP. ###
BELMONTE ISA SA MGA BISITA SA PAGDIRIWANG NG IKA-70 ANIBERSARYO NG FFCCCII
Ni: Rjhay E. Laurea
PINAUNLAKAN ni Quezon City Mayor Joy Belmonte ang imbitasyon ng Federation of Filipino Chinese Chambers of Commerce and Industry, Inc. (FFCCCII), sa pangunguna ng presidente nitong si Dr. Cecilio K. Pedro, kaugnay ng pagdiriwang ng ika-70 anibersaryo ng nasabing grupo na ginanap sa SMX Convention Center sa SM Mall of Asia Complex sa Lungsod ng Pasay.
​
Ang pagdiriwang ngayong taon, na may temang "Dugong Tsino, Pusong Pinoy", ay nagbibigay-pugay sa pitong dekada ng makabuluhang kasaysayan ng FFCCCII sa larangan ng negosyo, at pagkakawanggawa, at sa hindi matatawarang ambag ng organisasyon sa lipunan at ekonomiya ng bansa.
​
Kabilang sa mga dumalo sa naturang okasyon sina First Lady Liza Araneta-Marcos, Former President Gloria Macapagal Arroyo, Sen. Cynthia Villar, Sen. JV Ejercito, Sen. Win Gatchalian, DTI Sec. Alfredo Pascual, DA Sec. Francisco Tiu Laurel, Jr., at Philippine Red Cross Chairman Richard Gordon.
​
Naroon din ang ilang Metro Manila mayors gaya nina Taguig City Mayor Lani Cayetano, Malabon City Mayor Jeannie Sandoval, at San Juan City Mayor Francis Zamora. Dumalo rin ang ilang opisyal ng Lungsod Quezon na sina Coun. Wency Lagumbay at QC Local Economic Investment and Promotions Office Head Jay Gatmaitan.###
BALITANG KALINANGAN
Sabado, Marso 9, 2024
VPSD IKINATUWA ANG PAGBISITA SA ISANG PAARALAN SA MALAYSIA
Ni: Rjhay E. Laurea
IKINALUGOD ni Vice President Sara Z. Duterte ang pagbisita niya sa isang paaralan sa Kuala Lumpur, Malaysia matapos siyang makibahagi sa tree planting activity ng nasabing institusyon.
​
Ang eskuwelahan na binisita ng Bise Presidente ay ang Setapak Vocational College kung saan siya mismo diumano ang kauna-unahang mataas na opisyal na nakibahagi sa tree planting sa loob ng nasabing paaralan.
​
"Lubos pong katangi-tangi ang aking pagbisita sa Setapak Vocational College sa Kuala Lumpur, Malaysia, dahil tayo po ay naging bahagi sa tree planting activity sa loob ng kanilang paaralan," sabi ni Duterte sa isang post sa kanyang opisyal na Facebook page.
"Isa pong karangalan para sa akin ang oportunidad na ito dahil ayon po sa kanila, ako ang kauna-unahang mataas na opisyal na nakibahagi sa tree planting sa loob ng kanilang institusyon," aniya pa.
Ang itinanim ni Vice President Duterte ay Ambarella na isang fruit-bearing tree at ipinangako niyang babalikan para matingnan kung ito ay lalago at mamumunga.
"Maraming salamat Setapak Vocational College sa mainit ninyong pagtanggap sa akin. Kapuri-puri at nakakamangha ang ginagawa ninyong pamamaraan para mabigyan ng mga praktikal na kasanayan ang inyong mga estudyante," dagdag pa ng Bise Presidente.
Nanawagan naman si Duterte sa mga Pilipino na patuloy na maging MATATAG tungo sa pagtaguyod ng isang Bansang Makabata at mga Batang Makabansa. ###
MATAAS NA OPISYAL NG SMDC BINIGYAN-DIIN ANG KAHALAGAHAN NG KABABAIHAN SA LIPUNAN
Ni: Rjhay E. Laurea
Ms. Jessica Sy
SMDC AVP-Project Director
SA PAKIKIISA ng SM Supermalls sa pagdiriwang ng Pandaigdigang Buwan ng Kababaihan (International Women's Day o IWD), isang magandang mensahe ang ipinahayag ng isa sa mataas na opisyal ng SM Development Corporation (SMDC) bilang pagsasara ng International Women's Day Forum kahapon.
​
Pinaalala ni Ms. Jessica Sy, assistant vice president (AVP) - project director ng SMDC ang kahalagahan ng pamumuhunan sa mga kababaihan.
​
Sa kanyang talumpati binigyang diin niya ang mahalagang gampanin ng kababaihan sa buhay ng bawat isa maging ito man ay sa kanya-kanyang tahanan o sa lugar na ating pinagtatrabahuhan.
​
"We recognize the significant role women play in our organization, but more importantly, in our lives—at home and in the workplace. Investing in women is not just a moral imperative but a strategic imperative for a better world," ayon kay Sy.
Ang SMDC ay isang realty development company na nag-aalok ng mga abot-kayang condominium units at bahay at lupa bilang bahagi ng pagsasakatuparan ng layon ng chairman nito na si Henry Sy, Jr., na gawing "Bayan ng mga May-ari ng Bahay" o "Nation of Homeowners" ang Pilipinas.
Nitong nakaraang Marso 8, 2024, nakiisa ang sister company ng SMDC na SM Supermalls sa pagdiriwang ng International Women's Day at isang summit nga ang ginanap sa Samsung Hall ng SM Aura sa Taguig bilang bahagi ng pakikiisa ng SM sa IWD.
Mahigit isang libong women empowerment at gender equality advocate ang nakiisa sa aktibidad na may temang “Invest in Women: Accelerate Progress”.
Nanguna sa naging tagapagsalita ng programa si Senate President Pro Tempore Loren Legarda bilang keynote speaker at dumalo rin dito sina SM Supermalls President Steven Tan, United Nations (UN) Women Philippines Country Coordinator Rosalyn Mesina, Philippine Commission on Women (PCW) Officer-in-Charge Atty. Khay Ann Magundayao-Borlado at Deputy Executive Director Kristine Balmes.
Naroon din ang broadcaster na si Bernadette Sembrano bilang moderator.
Nagsama-sama sa summit ang ilang tinitingalang tagapagsalita at panelist na sina UN Philippines Resident Coordinator Gustavo Gonzalez, Australian Ambassador HK Yu PSM, Canadian Ambassador David Hartman at She Loves Tech co-founder Leanne Robers na naroroon sa pangunguna na rin ng PCW at UN Women, sa pakikipagtulungan sa SM Supermalls. ###
BALITANG KALINANGAN
Biyernes, Hulyo 7, 2023
CALORIE LABELING SA MGA RESTO SA QC, ISINUSULONG NI MAYOR BELMONTE
Ni: Khryzz Daynata
Isinusulong ni Quezon City Mayor Joy Belmonte na malagyan ng calorie count ang mga pagkaing nasa menu sa mga restaurant sa Quezon City.
​
Ayon kay Mayor Belmonte, ang hakbang ay upang mapangalagaan ang kalusugan ng publiko lalo na ng mga taga-QC mula sa mga kinakaing pagkain sa mga restaurant sa lungsod.
​
Idinagdag pa ng alkalde na inaasahang magiging ordinansa na sa QC ang calorie labeling project sa lungsod bilang isang hakbang para maprotektahan ang mga QCitizens sa mga kinakain.
Binigyang diin nito na patuloy ang pagtaas ng bilang ng mga may sakit na diabetis, hypertension at sakit sa puso dulot nang walang patumanggang pagkain ng mga unhealthy foods.
Ayon kay Mayor Belmonte ang nasabing calorie count ay dapat na kasama sa menu sa ilalim ng pangalan ng pagkain ng mga restaurant.
​
Sa pamamagitan nito aniya ay agad malalaman ng kostumer ang mga healthy foods na dapat orderin at kakainin sa mga restaurant sa lungsod.
Base sa datos ng QC mula sa pinaigting na risk assessment ng lungsod, may 80 percent ang itinaas ng kaso ng may sakit ng hypertension, habang mula sa 2,000 ay umakyat naman sa 11,000 ang kaso ng may diabetis sa lungsod.###
5K ESTUDYANTE, NATULUNGAN NG ANGAT BUHAY NI ROBREDO
Ni: Khryzz Daynata at Alfredo Patriarca, Jr.
AABOT sa 5,168 mga estudyanteng Pilipino ang natulungan ng Angat Buhay Foundation ni dating vice president Atty. Leni Robredo sa loob lamang ng isang taon. Ang naturang mga estudyante ay nakatanggap ng mga gamit pang-edukasyon at ang iba ay nakadalo sa mga sesyon ng pagtuturo.
Ang mag-i-isang taon na foundation na itinatag ni Robredo sa tulong ng mga local partners ay nakapagtayo ng 137 learning facility sa buong bansa na tinatawag na community learning hubs o CLH. Ang mga CLH ay naglalaman ng mga kagamitan sa pag-aaral para sa mga mag-aaral, kabilang ang mga sinanay na boluntaryo sa pagtuturo.
​
Sa ilalim ng programa, ang mga mag-aaral ay tinuturuang magbasa at maging bihasa sa numero na siyang sentro ng ‘Angat Basa’ at ‘Angat Bilang’. Ang nasabing mga hub ay nagta-target ng mga estudyante na hinamon sa numeracy at hindi nakababasa. Nagtalaga ito ng 900 boluntaryo sa pagtuturo.
​
"Ang Community Learning Hubs ay ang aming tugon sa krisis sa pag-aaral ng bansa," sabi ni Robredo.
​
Batay sa datos ng World Bank na inilabas noong nakaraang taon, nasa 90.9% ang mga Pilipinong nahihirapang mag-aral, nangangahulugan ito ng kawalan ng kakayahan na basahin o maunawaan ang isang simpleng teksto o kwento sa edad na 10. Ang Pilipinas ay pumangalawa sa pinakamababa sa Southeast Asia para sa mga Grade 5 kung ang pagbabatayan ay kasanayan sa pagbabasa at matematika.
​
Ayon sa Southeast Asia Primary Learning Metrics 2019. “Ang pagpapabuti ng literacy at numeracy ng mga estudyanteng Filipino ay nangangailangan ng community-based involvement.” Batay sa pagsubaybay ng foundation, lahat ng hub ay nagpapabuti sa literacy ng mga mag-aaral habang 95% ng mga mag-aaral ay bumuti sa kanilang numeracy mula pre-test hanggang post-test.
​
Sa kasalukuyan, hindi bababa sa 4,800 mag-aaral ang nasa ilalim ng mga aktibong CLH sites. Ang mga site ng CLH ay matatagpuan sa Metro Manila at mga geographically isolated at malalayong lugar sa 30 probinsya kabilang ang Tarlac, Catanduanes, Guimaras, Bohol, Sultan Kudarat, Zamboanga Sibugay, at iba pa.
​
Bukod sa CLH sites, ang Angat Buhay ay nagpatayo rin ng mga dormitoryo sa Infanta, Quezon at Camarines Norte at mga silid-aralan sa Camarines Sur at Maasin, Iloilo.
​
"Ito ang kapangyarihan ng bayanihan mula sa pribadong sektor, mga katuwang sa komunidad, at mga boluntaryong tumutulong," pahayag ng foundation. "Tunay, kailangan ng isang komunidad upang mapalaki ang isang bata. Nagsisimula pa lang tayo at marami pa tayong gagawin," dagdag pa nilang pahayag. ###
BALITANG KALINANGAN
Miyerkules, Hulyo 5, 2023
Pondo ng QC Gov't na gagastusin sa mga unhealthy food, binawal ni Mayor Joy
Ni: Khryzz Daynata
Ipinagbabawal ni Quezon City Mayor Joy Belmonte sa mga tanggapan sa QC Hall at sa mga barangay na gumastos ng pondo ng lokal na pamahalaan para ipambili ng mga hindi masustansiyang pagkain na ipapakain sa kanilang mga pagpupulong.
​
Sa ipinalabas na polisiya ni Mayor Belmonte, ang naturang hakbang aniya ay nakasaad sa Healthy Public Food Procurement Policy na pinatutupad sa QC.
​
Nakasaad sa naturang polisiya na walang pondong magagastos ang mga tanggapan sa QC Hall at mga barangay sa pagbili ng mga pagkain na ihahain sa kanilang mga pagpupulong kundi masustansiyang pagkain lamang tulad ng nilagang saba, kamote at iba pang healthy foods.
​
Ikinatuwa naman ni Mayor Belmonte ang pagsunod ng ilang barangay sa naturang polisiya na talagang hindi naghahain ng unhealthy foods.
​
Ang bagong polisiya sa QC ay bunsod na rin ng pagtaas ng bilang ng mga QCitizen na nagkakasakit ng hypertension, diabetis at sakit sa puso na pangunahing dahilan ng pagkakasawi ng mga tagalungsod.###
BALITANG KALINANGAN
Lunes, Hulyo 3, 2023
CHAMBA FITNESS DANCE SUPORTADO NG 6 QC SECTOR REPRESENTATIVES
Ni: Khryzz Daynata
Mga QC Sector Representatives kasama ang ilan sa kanilang tagasuporta
at Kalinangan TV News Team
SUPORTADO ng anim na sectoral representatives ng Quezon City ang "Chamba: Sayawit sa Linggo ng Wika" na ilulunsad ng Kalinangan TV at Kiwanis Club of QC Legends sa Agosto.
​
Kabilang sa mga nagpahayag ng suporta sa proyekto ang Kapatiran ng Mamamahayag sa Pilipinas, 4Ks Solo Parents Federation of Quezon City, Barangay Culiat Solo Parents, District 6 WE Pride Council Federation, E-Merge United Zumba Ladies of Escopa 3, at Malasakit at Respeto sa Mamamayan Movement District 4, pawang mga kasama sa QC Council of Sectoral Representatives - City Development Council.
​
Miyembro ng naturang mga grupo ang mga professional, solo parents, LGBT, socio-cultural, at mga mula sa sektor ng kalusugan.
​
Mula sa dating "Chamba Independence Day: Sayawit Para sa Kalayaan", ang aktibidad ay babansagan nang “Chamba: Sayawit sa Linggo ng Wika" na gaganapin sa Quezon City Memorial Circle covered court sa August 12, 2023, Sabado mula 8:00 ng umaga hanggang 6:00 ng hapon.
​
Ang Chamba ay isang Filipino fitness dance na binuo ng kilalang dance guru na si Mel Feliciano. Ito ay magkahalong Chacha, modern dance at Samba. Ito rin ay isang fitness dance na mas mabagal kumpara sa kilalang Zumba na mula sa Latin America.
​
Layunin ng proyektong "Chamba: Sayawit sa Linggo ng Wika" ang magbigay ng libreng health services sa mga residente ng Quezon City sa pamamagitan ng pakikipagtulungan ng isa sa partner-sponsor na Noblelife International na siyang magbibigay ng libreng health assessment at check-up sa mismong araw ng aktibidad.
​
Magbibigay din ang Noblelife International ng libreng detoxifiers at healthy coffee. Magkakaroon din ng raffle prizes sa gitna ng event at bukod sa Chamba Fitness Dance Clinic ay magkakaroon din ng On-The-Spot (OTS) Dance Contest.
​
Isa pang highlight ng programa ang pag-awit ng live ng mga singers kung saan maaring sabayan ng sayaw ng mga kalahok.
​
Ayon kay Rjhay Laurea, kinatawan ng professional sector, ang programa ay isang “one-of-a-kind experience” sa mga residente ng lungsod.
​
“This is a one-of-a-kind experience for all the QCitizens. Beside the health services it offers, it also promotes the culture of bayanihan where well-off people and philanthropists can sponsor the less fortunate ones so they will be able to join the activity,” pahayag ni Laurea.
​
Paliwanag ni Laurea, posibleng maging libre ang registration fee sa mga nais na lumahok siguraduhin lamang na may benefactor na mag-i-sponsor ng slot para sa kanila.
​
Sa mga nais na mag-avail ng free slot, maaaring mag-register online sa pamamagitan ng Google form mula sa Kalinangan TV na naka-post sa kanilang Facebook page.
“We invite all the QCitizens to participate in this event. And we also would like to thank the Quezon City Government headed by Mayor Joy Belmonte and the Quezon Memorial Circle Administration under the supervision of Mr. Windsor Bueno for fully supporting our program which aims to promote a healthy lifestyle among QC residents,” dagdag pa ni Laurea. ###
BALITANG KALINANGAN
Miyerkules, Hunyo 28, 2023
MGA PINOY HATI ANG OPINYON SA BAGONG SLOGAN NG DOT
Ni: Rjhay E. Laurea
Bidyo mula sa Department of Tourism
UMANI ng samu't saring reaksyon mula sa netizens ang bagong slogan ng Kagawaran ng Turismo (Department of Tourism o DOT) na "Love the Philippines". May nagustuhan ang bagong branding, ngunit, mas marami ang tila hindi nasiyahan sa pagbabago.
​
Sa opisyal na Facebook page ng DOT kung saan naka-post ang opisyal na pahayag ni Tourism Secretary Christina Garcia Frasco, ilang mga netizens ang pumuna sa bagong slogan ng DOT at marami ang nagtanong kung bakit pinalitan pa umano ang "It's more fun in the Philippines" na 11 taon nang ginagamit ng Pilipinas bilang slogan.
​
"Ika nga don’t fix what’s not broken. Ba't binago pa na mas may impact pa yung 'It's more fun in the Philippines' kaysa bago na slogan... ibang South East Asian Countries nga hindi nagpapalit ng slogan/tagline. Itong 'Pinas papalit-palit kakaloka! To be honest, walang impact ang bago na slogan. Hindi nag-trend sa Twitter, hindi gaya nung 'It’s more fun in the Philippines', nag-number 1 trend sa Twitter worldwide kasi catchy at may impact," ayon sa netizen na si Jerryvale Pierre Luego.
​
"Best pa rin ang 'It's more fun in the Philippines'! And it will be best if we have a good NAIA management who will regulate the multiple flight cancellations/delays. How can we attract tourists if we have poor NAIA experience?" sabi naman ni Angel Robles.
​
"Love is complicated. Fun is not. Bring back 'It's more fun in the Philippines'," pahayag naman ni Juan Carlos.
​
"Ang tanong magkano naging budget to conceptualize a new tourism slogan, which is not essentially needed as the previous one is working," komento naman ni Roel Balingit.
​
"Alam n'yo ba na nagpa-bid ang DOT para sa slogan na ito. They paid the winner 50 million pesos. What a waste of taxpayers money. Pwede naman sila magpa-online contest tapos pumili sila ng candidates at gumawa ng poll para malaman ano ang gustong slogan ng madla to represent the country," pagsisiwalat naman ni Cris Flores.
​
Pero paliwanag naman ni Secretary Frasco, ang slogan na "Love the Philippines" ay hindi lamang bilang isang branding campaign para sa Pilipinas kundi ito ay isang panawagan sa mga Pilipino na alalahanin ang ganda ng ating bayan, kilalanin ang ating kasaysayan at tumingin sa hinaharap nang taglay ang kabutihan at pagpapahalaga ng isang Pilipino.
​
"There is so much more to the Philippines than the fun and adventure that we have so far articulated to the world, for the Philippines is a powerhouse of mega biodiversity, being only one of 18 mega biodiverse countries in the world, a deep well of culture and history, a profound burst and taste of flavor and gastronomy, a tapestry of indigenous peoples and creative communities by whose work of their hands have safeguarded the dignity and integrity of the Filipino identity," ayon kay Frasco.
​
"This is who we are. These complexities and nuances of the Philippines have yet to be fully articulated to the world for indeed the story of the Filipino has yet to be fully told, and we shall tell the story by telling them the story of love," aniya pa.
​
Nakakuha naman ng kakampi ang DOT sa katauhan ni Senator Chiz Escudero na nanawagan sa publiko na bigyan ng pagkakataon ang bagong slogan na "Love the Philippines"
​
Aniya, bagamat epektibo naman ang “It’s more fun in the Philippines" na nakaakit ng 4.47 milyong turista noong 2013 at 8.26 milyon naman bago ang COVID-19 pandemic noong 2019, maganda ring bigyan ng pagkakataon ang bagong slogan.
​
“While I believe in the saying ‘if it ain’t broke, why fix it?’ I am willing to give it a chance,” sabi ni Escudero. “The last thing I want is for our country and people to be seen bickering about our slogan in front of foreigners or tourists—our putative market. I refuse to be part of any such thing until we have given it a chance,” dagdag pa niya
​
Paliwanag pa ni Escudero ang pagiging epektibo ng slogan ay nakadepende sa maraming factors tulad ng mga kakaibang puwedeng maibigay ng ating tourist destinations, target na mga turista at istratehiya sa pagkalakal nito. Aniya pa, dapat nakakatawag ng atensiyon, madaling matandaan at naglalahad ng positibong mensahe ang isang slogan tungkol sa esensiya ng isang lugar at makikita naman ang mga katangiang ito sa "Love the Philippines."
​
“My personal favorite is ‘Incredible India.’ This slogan, for me, works well because it is simple, memorable, and accurately captures the essence of the destination it represents,” dagdag pa ni Escudero na inihalimbawa ang napakaiksi pero makahulugang slogan ng India.
​
Suportado rin ng Office of the Vice President (OVP) ang bagong slogan. Ayon sa isang post sa opisyal na Facebook page ng OVP: "From sunrises to sunsets, the waters and the mountains, the smiles, the experiences and more there is so much to see and much more to love. Come and visit us! We're ready to share them with you."
​
Personal din na nagparating ng suporta si Pangulong Ferdinand "Bongbong" Marcos sa bagong slogan sa pagdalo nito sa Ika-50 Anibersaryo ng DOT.
​
May ilang netizens naman ang natuwa at nagustuhan ang bagong slogan na diumano'y nakakapukaw ng kanilang pag-ibig sa Pilipinas at sa pagiging Pilipino.
​
"I love the new slogan 'Love the Philippines', kabog, bongga and wow na wow ang pagkagawa ng video. 'Yung 'Its more fun (in the Philippines)" kasi ginawang katatawanan ng iba dito sa 'Love the Phillipines', kailangan nating mahalin ang Pilipinas," komento ni Leroy Demiao sa YouTube account na Tourism Philippines ng DOT.
​
"'Love the Philippines' hits differently, after all we've been through a lot since the pandemic. It's like a warm hug, showing empathy and understanding. It reminds me that amidst the chaos, our beautiful country gives us countless reasons to cherish and appreciate its resilience," sabi naman ni Juancho Ogal.
​
"It is more suitable than 'It's more fun in the Philippines'. It encapsulated all to what the Philippines could offer to the world. Congrats DOT," ayon naman kay Joel Matas.
​
"Indeed! 'Love the Philippines' because it is more fun in the Philippines!!! A step up slogan from the previous and I like it. It is simple and a very relatable word. Can be easily used by various provinces in the country like 'Love Bohol'... 'Love Cebu'... 'Love Davao'," reaksyon naman ni Ai Mendoza.
​
Paliwanag naman ni Marie Adriano ng DDB Group Philippines at isang brand and strategic planner, bagamat positibo naman ang tema ng "It's more fun in the Philippines" dahil ang pagiging masayahin ay bahagi na ng DNA ng mga Pilipino, mas may lalim naman ang ibig sabihin ng "Love the Philippines."
​
Matapos umano ang pandemya ay nagbago na ang pananaw ng mga manlalakbay at humahanap na sila ng tunay na karanasang makapagbibigay sa kanila ng pagkakataon na marananasan ang ibang kultura at hindi ordinaryong mga gawain.
​
“Brand enhancement is imperative to stay competitive and relevant. We can choose to stay where we are or choose to pivot and realize the vision of the future. What they're seeking today and what interest them to travel, we have it. The wonderful thing is we actually have it and more, it's just that they don't know yet,” sabi pa ni Adriano.###
BALITANG KALINANGAN
Biyernes, Hunyo 23, 2023
Grupong Pangkalikasan, Midya Nagsanib Puwersa para Mapabuti ang Pag-abot ng Babasahing Pang-edukasyon sa mga Kabataan ng QC
Ni: Alfredo Patriarca, Jr.
DALAWANG non-government organizations ang nagsanib ng puwersa para mapabuti pa ang pag-abot ng mga batang mag-aaral ng Lungsod Quezon sa mga babasahing pang-edukasyon matapos nga na magbigay ang mga ito ng kabuuang 3,376 na aklat ng K-12 sa Quezon City Public Library (QCPL) noong nakaraang Lunes, Hunyo 19, 2023 habang isinasagawa ang regular na Flag Raising Ceremony ng Pamahalaang Lungsod.
Personal na iniabot ng mga opisyal ng Kapatiran ng mga Mamamahayag sa Pilipinas (KMP) at ng Ban Toxics Philippines (BAN Toxics) ang mga nasabing aklat sa mga opisyal ng Lungsod Quezon na pinangungunahan ni Mayor Joy Belmonte at ni QCPL officer-in-charge (OIC) Ms. Mariza G. Chico.
"Bilang kinatawan ng sektor ng mga propesyunal sa QC Council of Sectoral Representatives (QC-CSR) ng City Development Council (CDC), pangunahing tungkulin namin ang suportahan ang Pamahalaang Lungsod, sa ilalim ng pamumuno ni Mayor Belmonte, upang maabot ang mga layunin nito na nakapaloob sa kanilang 14-Point Agenda kung saan kabilang ang pagbibigay ng mataas na kalidad ng edukasyon sa kanilang nasasakupan,” sabi ni KMP president at Professional Sector Representative Rjhay E. Laurea.
"Nagpapasalamat kami sa Ban Toxics Philippines na ipinagkatiwala nila sa amin ang pag-facilitate ng donasyon ng mga aklat na kanilang nakolekta mula sa iba’t ibang stakeholder at nang pormal itong maiabot sa Pamahalaan ng Lungsod Quezon sa pamamagitan ng pampublikong aklatan ng lungsod,” dagdag pa ni Laurea.
Si Laurea ay pangulo rin ng isa pang organisasyong sumuporta sa proyekto - ang Kiwanis Club of Quezon City Legends, isang sangay ng internasyunal na CSO na ang adbokasiya ay protektahan at pangalagaan ang karapatan, kagalingan at interes ng mga bata.
Maliban sa pagiging kasapi ng CDC, ang QC-CSR ay nagsisilbi ring pansamantalang executive committee ng People's Council of Quezon City (PCQC) na binubuo ng 50 sector representatives mula sa 23 sektor na hinalal ng mga kinikilalang civil society organizations (CSOs) ng Pamahalaang Lungsod.
"Tungkulin namin bilang civil society organization na makipag-ugnayan sa mga paaralan at sa mga komunidad at magsagawa ng mga proyekto at programa na makakatulong na mapagaan ang kanilang kondisyon at makapag-ambag para sa mas ligtas at malusog na kapaligiran,” pahayag naman ni BAN Toxics executive director Mr. Rey San Juan.
"Bilang tagapangalaga ng daigdig, may responsibilidad tayo na protektahan ang ating pangkalahatang tahanan, protektahan ang ating mga kabataan, para sa isang hinaharap na malaya sa mga lason at basura,” dagdag pa niya.
Ang book donation ay bahagi ng Toxic-Free and Waste-Free Schools Program (TFSP) project ng BAN Toxics kung saan hinihikayat nito ang mga institusyong pang-edukasyon sa lahat ng antas na magsagawa ng mabuting pangangasiwa ng kanilang mga basura at kemikal habang nag-o-operate, nang sa gayon ay maisakatuparan din ang pagkakaroon ng malusog na kapaligiran.
Hindi lamang umano nakakapagbigay ng libreng aklat sa mahihirap na estudyanteng may limitasyon sa pagkuha ng mga impormasyon ang book donation drive sapagkat nakakatulong din ito na mabawasan ang mga basurang papel dahil hinihikayat nito ang mga nagmamay-ari ng libro na i-donate na lamang sa halip na itapon ang mga aklat na hindi na nila kailangan. Nakakatulong din ito sa pagpapabuti ng kalidad ng edukasyon sa komunidad.
Pinasalamatan naman ng QC Government ang dalawang grupo kasabay ng paghikayat nito sa iba pang CSOs na makipagtulungan sa pamahalaan sa pamamagitan ng PCQC.
"Maraming salamat kina Mr. Rey San Juan at Mr. Thony Dizon ng Ban Toxics Philippines, Kiwanis Club of QC Legends at sa Kapatiran ng mga Mamamahayag ng Pilipinas sa pangunguna ng kanilang presidente at QC Professional Sector Representative na si Rjhay Laurea. Nagbigay sila ng 3,376 K-12 textbooks na ibabahagi sa QCPL branches at sa mga public K-12 schools sa QC," paahyag sa post sa opisyal na QC Government Facebook page.
Sinaksihan din ni QC-CDC CSO Representative to the Execom Mr. Brian Lu ang turn over ceremony kung saan sinabi niyang: "Parehong kinikilalang CSOs ng QC Government ang KMP ng professional sector at BAN Toxics ng environmental sector, nagpapasalamat kami sa dalawang grupo sa pagpapakita ng magandang halimbawa sa kung ano ang tunay na esensiya ng people’s participatory government - ito ang kolaborasyon ng pamahalaan at ng pamayanang sibil.”###
BALITANG KALINANGAN
Lunes, Hunyo 19, 2023
WALANG KATAPUSAN ANG PAGKILALA NG MGA PINOY SA LAHAT NG MAGIGITING NA AMA
Ni: Patrick Garin
Sa araw-araw na pwede nating pasalamatan ang mga haligi ng ating tahanan, natatangi ang "Fathers' Day" (Araw ng mga Ama) upang iparamdam sa kanila na espesyal sila at ipakita ang ating pagmamahal sa mga dakilang ama ng bawat pamilya.
​
Nagsimulang sumikat ang Araw ng mga Ama sa Pilipinas noong dekada '80. Inilabas ni Pangulong Ferdinand Marcos Sr., ang Proclamation No. 2037, na nagdedeklara sa unang Linggo ng Disyembre bilang Araw ng mga Ama, habang ipinagdiriwang ng mga Pilipino ang Araw ng mga Ina sa unang Lunes.
Sa kabilang banda, muling binago ang petsa ng taunang pagdiriwang sa panahon ng rehimen ni Pangulong Joseph "Erap" Estrada sa ilalim ng Proklamasyon Blg. 58, na nagbalik sa pambansang pagdiriwang sa unang Lunes ng Disyembre. Ito ay naging isang pinagsamang pagdiriwang ng pagiging magulang, na sumasaklaw sa parehong ama at ina. Sa likod ng maraming pagbabago sa petsa sa paglipas ng mga taon, naging mas pare-pareho ang pagdiriwang ng Fathers' Day tuwing ikatlong Linggo ng Hunyo at Mother's Day tuwing ikalawang Linggo ng Mayo, alinsunod sa mga internasyonal na petsa ng pagdiriwang.
​
Umiiral na mula noon hanggang sa kasalukuyang panahon ang araw ng pagkilala sa bawat ama ng pamilya. Gayunpaman, hindi lang ito para sa kanila dahil kinikilala rin ang mga tumatayong ama; lolo, tito, kuya, o kahit pa maging si mama. Basta't itinataguyod ang pamilya at gumagabay, itinuturing na rin silang ama ng makabagong panahon.
​
Mula rito kaya naman nagpahayag ng pagbati si Congressman Arjo Atayde ng Quezon City kaugnay ng pagdiriwang. "Ako po ay bumabati ng Happy Fathers Day sa lahat ng mga ama, mga panganay na naging ama rin, mga single moms na tumayo bilang ina at ama, at maging sa lahat ng taong nagsisilbi bilang haligi ng mga tahanan. Ang inyong hindi matatawarang sakripisyo at pagmamahal sa pamilya ay aming lubos na hinahangaan at pinasasalamatan. Muli po, Maligayang Araw ng mga Ama po sa inyo," saad ni Atayde sa kanyang Facebook post.
​
Kinilala rin ni Bise Presidente Sara Duterte ang magigiting na ama sa pamamagitan ng isang mensahe. "Ngayon, pinararangalan at ipinagdiriwang natin ang lahat ng mga ama na naglalaman ng lakas, responsibilidad, at pagsusumikap - ang mga ama na ang mga sakripisyo ay naging matibay na pundasyon ng ating mga tahanan. Ang karunungan, patnubay, at suporta ng isang ama ay mahalagang pinagmumulan ng ating lakas at pagpapahalaga, na tumutulong sa atin na lakbayin ang buhay at malampasan ang mga hamon na kinakaharap natin bilang mga indibidwal, bilang isang pamilya, at bilang isang komunidad. Sila ang ating mga huwaran ng determinasyon, disiplina, at dedikasyon sa pagbuo ng isang ligtas na kinabukasan," pahayag ni Duterte.
​
Labis ang sakripisyong ginagawa ng bawat ama para sa kanilang pamilya, kaya naman ganon na lamang ang pagkilala ng marami sa atin, sa magigiting na ama. Kung kaya't likas sa ating mga Pinoy na ipagdiwang ang araw na ito. Maaring sa pamamagitan ng paghahanda ng kahit kaunting salu-salo, pamamasyal, pagbibigay regalo, o kahit simpleng pagsulat lamang sa isang papel ng mga nais nating iparating sa kanila ay kuntento na basta kumpleto at masaya ang pamilya. Dahil sa kabila ng hirap at sakripisyo nila, hindi matatawaran nino man ang kanilang kadakilaan.
​
Hindi sapat ang isang araw ng pagdiriwang upang pasalamatan ang ating mga ama, maaaring araw-araw ay masabi natin sa kanila ang ating galak sa kanilamg pagmamahal para sa pamilya. Ang simpleng yakap minsan ay malaking bagay na sa kanila upang magpatuloy kumayod ay lumaban para sa mahal nilang pamilya.###
BALITANG KALINANGAN
Biyernes, Hunyo 9, 2023
GALING NG PINOY SA LARANGAN NG PAG-AWIT AT PAGMAMAHAL SA BAYAN NAKATATAK NA SA DAIGDIG
Ni: Patrick Garin
IBANDERA ang watawat ng Pilipinas sa buong mundo. Iparinig sa madla ang mga kamangha-manghang pagsasabuhay sa mga titik na nakalapat sa Pambansang Awit ng Pilipinas at ipakita ang tunay na talento ng mga Pilipino sa larangan ng pag-awit na matatawag nating yaman ng lahi at handang ipagmalaki kahit saan mang bansa.
​
Isa sa ipinagmamalaki at hindi matatawarang mang-aawit ng bansa si Charmaine Clarice Relucio Pempengco (ipinanganak noong Mayo 10, 1992), na mas kilala sa mononym na Charice, isa siyang Filipino recording artist at aktres na sumikat sa pamamagitan ng YouTube. Tinawag siya ni Oprah Winfrey bilang Most Talented Girl in the World. Ngayon, si Pempengco na kabilang na sa komunidad ng LGBTQIA ay kilala na bilang si Jake Zyrus pero ang naiambag niya sa musikang Pinoy ay kahanga-hanga.
​
Binigyan ni Pempengco ng sarili niyang rendisyon ang "Lupang Hinirang" na nagbigay daan kaya naman siya ginawaran ng National Historical Institute (NHI) ng perpektong score para sa kanyang rendisyon ng “Lupang Hinirang” sa inagurasyon ni dating Pangulong Benigno "Noynoy" Aquino III sa Quirino Grandstand taong 2010. Mas nakilala at naging tanyag ang singer na ito dahil sa mga papuring kanyang natanggap noong mga panahong iyon.
​
Isa rin si Sarah Geronimo sa mga binigyan ng pagkakataong umawit ng Pambansang Awit noong labanang Pacquiao-Morales III. Hindi inaprubahan ng NHI ang ilan sa mga bahagi ng sariling rendisyon ni Geronimo, ngunit nagpakita ang singer ng kanyang kakaibang istilo sa pag-awit, pinasigla niya ang kanyang pagganap sa lakas ng karakter na naglabas ng damdaming makabayan. Ito ay isang napakakumpiyansang pagtatanghal sa paraang acapella na talagang nagparamdam sa lahat ng pagmamalaki niya sa kanyang pag-awit at pagiging makabansa. Sa pagkakataong iyon, muling naipakita ang tunay na galing at talento ng mga Pilipino sa larangan ng pag-awit sa kabila ng mga problemang kinaharap ay nanatiling buo ang loob at paninindigan.
​
Kilala na sa buong mundo ang galing ng mga Pinoy pagdating sa larangan ng pag-awit. Hindi nakapagtataka sapagkat walang duda ang talento ng mga ito. Taong 2019 nang muling kinilala ang galing ng mga Pinoy sa Europa dahil dalawang choir mula sa lalawigan ng Cavite ang nangibabaw sa 39th International May Choir Competition na ginanap noon sa Varna, Bulgaria.
​
Ang Imusicapella na isang church-based choir sa Imus, Cavite ay nanalo sa Grand Prix ng Varna na nagsilbing tiket nila para makipagkumpitensya sa prestihiyosong European Grand Prix (EGP) para sa Choral Singing noong 2019. Sa pangunguna ni Tristan Ignacio, tinalo ng 18-member chamber choir ang siyam na choirs mula sa Europe at Asia, kaya sila ang unang Philippine church choir na naging qualified para sa EGP. Patunay lamang ito na hindi basta-basta ang mga Pinoy pagdating sa sining ng pag-awit.
​
Ipinagmamalaki rin ng bansa ang nagiisang si Lea Salonga-Chien na ipinanganak noong Pebrero 22, 1971, isa siyang Pilipina na mang-aawit at artista. Kilala siya sa pinagmulan ng pangunahing papel ni Kim sa musikal na Miss Saigon, kung saan nanalo siya ng Olivier, Tony, Drama Desk, Outer Critics at Theater World awards.
​
Siya ang unang Asyano na gumanap ng mga papel ni Éponine at Fantine sa musikal na Les Misérables sa Broadway. Nagbigay din siya ng boses sa pag-awit ng dalawang "prinsesa" ng Disney: Jasmine sa Aladdin (1992), at Fa Mulan sa Mulan (1998) at Mulan II (2004). Ilan lamang ito sa mga 'di matatawarang inuwing pagkilala at parangal ni Salonga para sa ating bansa. Dahil sa kanya mas naipakilala sa buong mundo ang galing ng mga Pilipino at hindi dapat na minamaliit sapagkat tunay na mayroon tayong maipagmamalaki sa larangan ng musika.
​
Nakaukit na sa kasaysayan ng mundo ang mga parangal na iniwan ng mga beteranong mangaawit. Naiparinig natin ang tinig ng mga Pinoy sa pamamagitan nila at naipakitang kaya nating makipagsabayan sa mundo. Dahil sa sining ng pag-awit, naiwagayway ang bandila ng ating bansa at naipagmalaki ang yaman at talentong Pilipino.
​
Ngunit, alam niyo ba na ilang mga eksperto ang nagpapalagay na ang husay sa pag-awit ng karamihan sa mga Pilipino ay hindi lamang nahulma dahil sa pag-aaral ng sining o pagbi-videoke, pinaniniwalaan umano na sa napakahusay na komposisyon ng ating "Lupang Hinirang", na kinakailangan makabisa at matutunan kantahin ng ordinaryong batang Pilipino, posibleng unang nahasa ang husay sa pag-awit ng karamihan sa mga Pinoy.
​
Kaya sa mga batang nais maging mahusay na mang-aawit, ugaliing dumalo sa inyong flag-raising ceremony sa paaralan at huwag hahayaang mahuli sa pagpasok. ###
BALITANG KALINANGAN
Miyerkules, Hunyo 7, 2023
MANANATILING BUHAY ANG SIKLAB NG KAGITINGAN NG ATING MGA NINUNO SA BANGKUSAY
Ni: Patrick Garin
Mga larawan mula sa DTCOM at NHCP
LUMIPAS ang ilang daang taon, niluma man ng panahon ang naratibo ng kagitingan ng matatapang nating ninuno, nananatiling buhay ang pagpaparangal at pagkilala natin sa kanila hanggang sa kasulukuyan.
​
Ginunita ang ika-452 anibersaryo ng Kagitingan sa Bangkusay sa Plaza Moriones, Tondo, Maynila noong ika-5 nitong Hunyo. Bilang pag-alala sa pagbubuwis ng buhay ng mga taong maituturing nating magigiting na mandirigma na anak ng bayan. Kapalit ang kanilang dugo't pawis, inialay ang buhay upang ipakita ang tunay na kahulugan ng patriyotismo para sa bayan.
​
Pinangunahan ng tagapangulo ng Pambansang Komisyong Pangkasaysayan ng Pilipinas (National Historical Commission of the Philippines o NHCP) na si Dr. Emmanuel Franco Calairo; kasama sina Punong Lungsod Maria Sheilah “Honey” Lacuna-Pangan ng Maynila; Gobernador Dennis G. Pineda ng Pampanga; Gobernador Daniel R. Fernando ng Bulacan; Alkalde Flordeliza C. Manlapaz ng Hagonoy, Bulacan; Alkalde Leonardo “Bobong” Flores ng Macabebe, Pampanga; at Direktor Robert Tantingco ng Holy Angel University - Center for Kapampangan Studies ang pag-aalay ng bulaklak sa panandang pangkasaysayang nakatirik dito bilang pagpapakita ng pasasalamat natin sa kasalukuyan.
​
Nanguna si Pangalawang Punong Lungsod John Marvin "Yul Servo" C. Nieto ng Maynila sa pagaalay ng panalangin para sa mga yumao, habang nagbigay naman ng bating pambungad si G. Charlie D.J. Duñgo ang tagapangasiwang opisyal ng Kagawaran ng Turismo, Kultura at Sining ng Maynila (Department of Tourism, Culture and Arts of Manila). Nagpahayag din ng mensahe ng pagkilala't pagpaparangal sina Tagapangulong Calairo, Gobernador Fernando, Gobernador Pineda at Punong Lungsod Lacuna-Pangan. Maipakikita natin kahit sa ganitong simpleng pamamaraan kung paano natin pinangangalagaan ang makasaysayang pamana sa atin ng mga matatapang nating ninuno.
​
Pagbabalik tanaw sa nakaraan, matatandaang noong 3 Hunyo 1571, hinarap ng nasa 2,000 mandirigma mula sa hilagang look ng Maynila ang mga sundalong Espanyol sa pangunguna ni Miguel Lopez de Legazpi sa isang wawa ng ilog Bangkusay, Tondo, Maynila. Nagpamalas ang mga katutubo ng kagitingang siyang gumawa ng 'di malilimutang kasaysayan, sa pangunguna ng isang pinunong mula Macabebe, Pampanga. Siya si Tarik Sulayman, ang pinakasikat sa ilang mga pangalan na iniuugnay ng mga historyador na Kapampangan sa indibidwal na namuno sa mga puwersa ng Macabebe laban sa mga pwersang Espanyol ni Miguel López de Legazpi noong panahon ng Labanan sa Bangkusay (Battle of Bangkusay Channel) noong Hunyo 3, 1571.
​
Sa kasamaang palad, hindi nakikilala ng mga record ng Espanyol ang indibidwal na iyon sa pamamagitan ng pangalan, kaya ang pagpapalagay ng pangalang Tarik Sulayman ay batay sa mga salaysay at kuwentong-bayan ng mga Kapampangan noong ika-19 na siglo. Gayunpaman, mananatili sa puso't isip ng bawat isang mamamayang Pilipino ang kagitingang ipinakita ng ating mga ninuno na kailanma'y hindi matatawaran ng kahit ano man, higit ng sino man.###
BALITANG KALINANGAN
Lunes, Hunyo 3, 2023
GALING NG PELIKULANG PILIPINO IPINAKITA SA BUONG MUNDO
Ni: Patrick Garin
Ang delegasyon ng Quezon City sa Cannes Film Festival sa pangununa nina District 1 Rep. Arjo Atayde at dating FDCP chairperson Liza Diño-Seguerra
IBIDA ang lokal na industriya ng pelikulang Pilipino sa buong mundo at patunayang kayang makipagsabayan ng mga Pinoy kahit pa sa "international stage".
​
Ito ang layon ng lokal na pamahalaan ng Lungsod Quezon nang taas-noong nirepresenta at ipinagmalaki ng Quezon City Film Development Commission (QCFDC) at QCinema International Film Festival Committee sa prestihiyosong Cannes International Film Festival at Marche du Film sa Cannes, France, ang mga pelikulang gawang Pinoy. Isang malaking tagumpay ang nasungkit ng lungsod sa pagtapak nito sa International stage sapagkat iilan lamang ang nabibigyan ng pagkakataong mapasama sa nasabing pagtitipon.
Alinsunod sa pangako ng lungsod na papaunlarin at papalakasin nito ang industriya ng pelikula, pinangunahan ni QC District 1 Congressman Arjo Atayde ang delegasyon ng QC. Nananatiling buo ang pagsuporta ni Atayde sa hangarin ng lungsod na maging film at entertainment capital ng Pilipinas ang QCinema.
​
Sa kasalukuyan, ang QCinema ang nangungunang international film festival sa buong bansa. Binubuo ito ng mga butihing kinatawan na sina artistic director Ed Lejano, executive officer Giana Barata, board member Armi Cacanindin at QC Film Foundation president Manet Dayrit. Sa pagtutulungan ng mga lider na ito, hindi imposibleng makamit ng lungsod ang tagumpay sa hangarin nito sa paglipas ng ilang taon.
​
Nakatuon ang QCFDC sa pagpapaunlad ng pagkamalikhain, pagsuporta sa umuusbong na talento, pagsusulong ng kultural at pang-ekonomiyang pag-unlad ng lungsod sa pamamagitan ng pelikula. Sa pangunguna ng isang pangkat ng mga propesyonal sa industriya, aktibong nakikipagtulungan ang QCFDC sa mga lokal at internasyonal na katuwang upang isulong ang paglago ng industriya ng pelikula sa Quezon City.
​
Hinirang na bagong kinatawan ng QCFDC si Liza Diño bilang executive director. Bilang dating chairperson at CEO ng Film Development Council of the Philippines, tangan ni Diño ang kanyang yaman ng karanasan at sigasig sa kanyang tungkulin tungo sa kampeonato sa industriya ng pelikula sa Lungsod Quezon.
​
Patuloy na isusulong ng komisyon ang paglago sa industriya ng pelikula. Sa pakikipagtulungan at sa buong suporta ni Quezon City Mayor Joy Belmonte, Vice Mayor Gian Sotto at ng lokal na pamahalaan, mamumuhunan sa sinehan ang lungsod bilang isang katalista para sa parehong kultura at pang-ekonomiyang pag-unlad nito.
​
Sa kanilang paglahok sa Cannes, nag-host ang QCFDC at QCinema ng dalawang kahanga-hangang kaganapan na gumawa ng kanilang marka sa internasyonal na komunidad ng pelikula. Ang unang kaganapan ay ang Film Festival Directors' Lunch noong Mayo 19 na dinaluhan ng A-list at kilalang film festival directors at programmers mula sa Locarno, Tallinn, Toronto, Venice, Fribourg, Three Continents – Nantes, Bucheon, Hawaii, Vesoul, New York, Vienna, Germany, Busan, Switzerland, Bangkok, at Rotterdam film festival. Ipinakilala ng eksklusibong pagtitipon na ito ang QCFDC at ang QCinema International Film Festival na may mga pagkakataon para sa mga collaborations at partnerships.
​
Ang ikalawang kaganapan, ang QCinema Night, ay naging saksi sa paglalahad ng mga kapana-panabik na plano ng QCFDC para sa ika-11 edisyon ng QCinema. Sa walang patid na pangako na suportahan ang mga tampok na pelikula, inanunsyo ng QCFDC na muling binubuhay nito ang kategoryang Asian Next Wave, habang pinapalawak ang seksyong RainbowQC upang higit na palakasin ang mga boses ng LGBTQIA+ sa loob ng festival. Ang mga inisyatiba na ito ay nagpapakita ng progresibong pananaw at dedikasyon ng QCFDC sa pagpapaunlad ng magkakaibang pagkukuwento at kahusayan sa sining.
​
Lubos na humahanga si Mayor Belmonte sa matagumpay na pakikilahok sa Cannes, kaya naman ayon sa kanya: "Labis naming ipinagmamalaki ang representasyon ng QCFDC sa Cannes International Film Festival at Marche du Film, pandaigdigang industriya ng pelikula. Kasama ang QCinema, ipinagmamalaki namin na ang aming mas pinalakas na komisyon sa pelikula ay mag-uuwi ng maraming pagkakataon upang makipagtulungan sa mga kinikilalang katuwang mula sa buong mundo."
​
Nananatiling matatag ang misyon ng QCFDC na isulong ang paglago ng industriya ng pelikula sa Quezon City, pagyamanin ang mga umuusbong na talento, at ipagdiwang ang magkakaibang mga salaysay na umaalingawngaw sa pandaigdigang saklaw. Dahil sa sigasig at talentong taglay ng mga Pilipino, hindi mamamatay ang alab ng tangan nitong pangarap para sa bayan.###
BALITANG KALINANGAN
Biyernes, Hunyo 2, 2023
INTER-FAITH DIALOGUE, MAHALAGA SA PAGKAMIT NG KAPAYAPAAN SA MINDANAO
Ni: Khryzz Daynata
Ang larawan ay mula sa Office of the Presidential Adviser on Peace, Reconciliation and Unity
LIKAS sa kultura ng Pinoy ang pagkakaroon ng takot sa Diyos kaya naman anomang problema, personal man o pang-komunidad, walang dudang maayos ito kung gagawing sentro ng usapin ay ang pananampalataya at paniniwala sa kapangyarihan ng may likha.
Batid ng lahat na ilang dekada na ang usapin sa pagkamit ng kapayapaan sa Mindanao, ilang pangulo na rin ang naihalal at nagdaan subalit hanggang ngayon, hindi pa rin ganap ang kapayapaan sa naturang lugar.
​
Kaya naman sa naganap na Mindanao Peace Forum 2023 na dinaluhan ng mahigit 100 lokal at dayuhang lider ng relihiyon, peace workers at kinatawan ng civil society ay binigyang diin ng mga ito ang kahalagahan ng inter-faith dialouge sa usaping pangkapayapaan sa Mindanao.
​
Layunin ng forum na inorganisa ng Asian Conference of Religions for Peace (ACRP) na palakasin ang inter-faith at inter-religious dialogue bilang paraan ng pagtataguyod ng kultura ng kapayapaan, mutual understanding at solidarity sa buong Mindanao.
Naniniwala si Cardinal Orlando Quevedo, arsobispo ng Arkidiyosesis ng Cotabato na makatutulong sa pagsusulong, pagbuo at pagpapanatili ng kapayapaan sa Bangsamoro Autonomous Region in Muslim Mindanao (BARMM) ang pagkakaroon ng inter-religious dialogue.
​
Aniya, kailangang “maalis” ang mga makasaysayang prejudices at biases na laganap sa Bangsamoro, na itinuturing na melting pot ng iba't ibang kultura, relihiyon at tradisyon.
​
“Ang mga mamamayan ng BARMM - mula sa iba't ibang kultura, iba't ibang relihiyon, iba't ibang tradisyon - ay kailangang maisakatuparan ang adhikaing ito... [na ito] ay isang proseso ng pagbabalik-loob ng isip at puso upang maunawaan, tanggapin at pahalagahan ang mga katotohanan ng iba," pahayag ni Quevedo.
​
Kaugnay nito, nanawagan din si Quevedo sa Bangsamoro Transition Authority (BTA) na gumawa at magpatupad ng “culture of peace program” na ipatutupad “sa mga tahanan, kapitbahayan, pribadong asosasyon, NGO at paaralan” sa buong rehiyon.
“Dapat kasama sa programang ito ng kultura ng kapayapaan ang pag-alam sa mga kultura at tradisyon ng iba, tungo sa pagkakaunawaan at pagkakasundo. Inter-faith at inter-religious dialogue [dapat] isulong hindi lamang sa mga lider ng relihiyon at pulitika kundi pati na rin [sa] grassroots,” dagdag pa niya.
​
Sa panig naman ni Atty. Michael Mastura, pangulo ng Sultan Kudarat Islamic Academy, sinabi niya na isang pangunahing haligi ng prosesong pangkapayapaan ng Bangsamoro, ang kahalagahan ng pagsali ng "third party" sa panahon ng negosasyong pangkapayapaan.
​
“Kapag iminungkahi namin ang isang balangkas kung saan magkakaroon ng isang ikatlong partido para sa dalawang panel ng negosasyon, magkakaroon ng bahagi hindi lamang sa tigil-putukan, ang International Monitoring Team, kundi isang balangkas kung saan magkakaroon ng mga kaibigan sa proseso ng kapayapaan," sabi ni Mastura.
​
Aniya, ang proseso ng kapayapaan ay hindi tungkol sa 'kawalang-kapayapaan' o kawalan ng digmaan o karahasan, kundi tungkot sa mga tao na nagsasama-sama at nag-iisip ng isang paraan upang hayaan ang mga partido na pumunta sa isang negotiating table.
Ayon naman kay Dr. Sunggon Kim, honorary president ng Religions for Peace Asia, na sa kabila ng pagkakatatag ng BARMM at ng rehiyonal na pamahalaan, mayroon pa ring “collision of powers” sa rehiyon.
​
Iginiit ni Kim na ang pagbuo ng kapayapaan ay hindi kailanman madali, dahil ang isang maliit na hindi pagkakaunawaan sa pagitan ng dalawang partido na nakikipag-usap ay maaaring mag-trigger ng hidwaan kung saan ang buong prosesong kapayapaan ay maaaring gumuho sa isang sandali.
"Bilang isang propesor ng relihiyon, naniniwala ako na ang relihiyon ay isang paraan upang mapagtanto ang pagmamahal sa ating kapwa at pagalingin ang mga taong nagdurusa. Ang forum na ito ay isang magandang okasyon upang pag-isipan kung ano ang tunay na layunin at tunay na tungkulin ng relihiyon,” paliwanag ni Kim.
​
Sinabi naman ni Fr. Carlos Reyes, ministro para sa Ecumenical and Interfaith Affairs ng Archdiocese of Manila, na ang relihiyon ay “ginagamit” sa buong mundo, gaya ng mapupulot mula sa kasalukuyang sitwasyon sa Ukraine.
​
“Hayaan na natin. May dalawang mukha ang relihiyon -- sina Dr. Jekyll at Mr. Hyde. At maaari nating balewalain ito sa ating kapinsalaan. Binibigyang-diin natin na tayo ay mga relihiyon para sa kapayapaan. Ang mga relihiyon ayon sa kalikasan at layunin, ay dapat na mga relihiyong nagtataguyod ng kapayapaan,” pahayag ni Reyes.
​
“Dapat isulong ng mga relihiyon ang pagkakaunawaan, pagkakaisa, pagkakapatiran at higit sa lahat, kapayapaan. Ang mga relihiyon ay dapat na katangian ng kapayapaan. Nasa atin, ang mga tunay na practitioner ng relihiyon, na ipakita sa sugatang mundong ito, ang tunay na mukha ng relihiyon,” dagdag niya.
Naniniwala naman si Acting Presidential Adviser on Peace, Reconciliation and Unity Sec. Isidro Purisima na ang mga pagtitipon tulad ng peace forum ay isang testamento "na sa kabila ng ating mga pagkakaiba, lahat tayo ay maaaring magkaisa at magtrabaho bilang isa sa pagtugon sa mga mahigpit na alalahanin ng lipunan na kinakaharap ng Mindanao." ###
PATULOY ANG SIKLO NG POLUSYON SA PLASTIK DAHIL SA KAPABAYAAN NG MGA PINOY
Ni: Patrick Garin
Mga kuha ni Ezra Acayan, isang litratistang mamamahayag.
TALAMAK hanggang sa kasalukuyan ang polusyong plastic sa Pilipinas. Binansagang "sachet economy" dahil kilala bilang isa sa mga bansang iresponsableng tagahakot ng basura at mga open dump site na nagiging sanhi ng pagtapon ng mga basurang plastik sa karagatan.
​
Nakaluklok ang bansa sa ikatlong pwesto bilang isa sa mga pinakamalaking nag-aambag ng mga basurang plastik sa buong mundo. Mahigit 0.75 milyong metrikong tonelada ng plastik ang nakukuha sa karagatan bawat taon. Masasalamin mula rito na labis ang kapabayaang ginagawa ng bawat isa pagdating sa pagsasaayos ng mga basurang plastik. Isa ang Pilipinas sa maraming bansa sa Timog Silangang Asya na tumatanggap ng iligal na pag-import ng mga plastik na basura mula sa mga mauunlad na bansa. Mahirap solusyunan ang polusyon sa plastik lalo pa't talamak ang paggamit nito sa bansa.
​
Inaasahan ng National Solid Waste Management Commission (NSWMC) na aabot sa 3.7 milyong tonelada ang mga basurang bubuo sa Metro Manila sa pagbubukas pa lamang ng taong 2023 dahil na rin sa kaliwa't kanang selebrasyon bunsod sa pagdiriwang ng bagong taon. Batay sa sa tantiya ng NSWMC, ang pagkain at mga organikong itinatapon ng mga mamamayan ay bumubuo ng 52 porsiyento ng basura ng Kalakhang Maynila habang 41 porsiyento ay nare-recycle at pitong porsiyento naman ang residual.
​
Nanawagan naman si Quezon City Mayor Joy Belmonte upang matugunan ang mga problemang ito sa mga basurang plastik. Nagpasimula ang Lungsod Quezon ng mga makabuluhang hakbang tulad ng pagbabawal sa mga isang beses lang nagagamit na lagayang plastik at mga disposable na kutsara't tinidor, straw at baso sa mga restaurant at fast food chain para sa mga dine-in na customer; at pagbabawal sa mga isang beses lang nagagamit na lalagyan at mga sachet sa mga hotel.
Itinatag ng lungsod ang Trash to Cashback program para mabawasan kahit papaano ang mga basurang plastik lalo na ang mga plastik na mababa ang halaga. Dadalhin ng mga residente ang kanilang mga recyclable sa mga itinalagang lugar kapalit ng mga environmental point na magagamit nila sa pagbili ng mga grocery at pagbabayad ng mga utility bill. Gayunpaman, ayon kay Belmonte, hindi pa rin sapat ang mga pagsisikap na ito upang ganap na matugunan ang mga hamon ng krisis sa basurang plastik.
​
Pahayag naman ni EcoWaste Zero Waste campaigner Jove Benosa, "Ang magkahalong basurang nakatambak sa mga kalsada at bangketa ay isang matinding paalala ng pangangailangang pag-ibayuhin ang mga pagsisikap sa lahat ng antas upang kontrahin ang itinatapon na kultura na may napapanatiling pamumuhay na, bukod sa iba pang mga bagay, paggalang at pangangalaga sa Inang Lupa, makatipid ng mga mapagkukunan, mapangalagaan ang kalusugan ng tao at, siyempre, pigilan at bawasan ang basura.”
​
Sumisigaw ng radikal na pagbabago ang polusyon sa plastik kung kaya nitong taong 2023, isang kritikal na pambansang batas ang naipasa sa Pilipinas na sumusulong sa ligal na balangkas na ito upang labanan ang plastik na polusyon nang higit pa. Pinamagatan ang batas na “Extended Producer Responsibility” (EPR). Nangangailangan ang batas ng mandatoryong EPR para sa mga negosyong may mga asset na nagkakahalaga ng higit sa ₱100 milyon.
​
Hinihikayat din ng batas ang mas maliliit na negosyo na boluntaryong lumahok sa programa. Ang prinsipyong “The polluter pays” ay sentro sa EPR, na nag-oobliga sa mga producer ng plastik na mga pabalat na ganap na umako ng responsibilidad para sa buong ikot ng buhay ng kanilang mga produkto, kabilang ang pamamahala ng basura. Nangangahulugan ito na ang mga nagdadala ng plastik na pabalat sa merkado ng Pilipinas ay dapat magbayad para sa halaga ng mga hakbang sa pag-iwas, paglilinis, at pagbawi ng basura.
​
Maraming salik ang nagbigay-daan upang magtagumpay ang sistema ng EPR para sa mga basurang plastik, na ang ilan ay maaaring gabayan ang Pilipinas. Kasama sa mga rekomendasyon ang pagpapataas ng kamalayan, epektibong pamamahala ng basura, wastong paghihiwalay, at paglalagay ng pasanin sa gastos sa mga prodyuser ng plastik upang tustusan ang pangongolekta, pag-uuri at pag-recycle. Ang tagumpay ng batas at pagpapatupad ng EPR sa Pilipinas ay nakasalalay sa pagtaas ng bilang ng mga pasilidad sa pagkolekta ng basura at pag-recycle na binabayaran ng mga tagagawa ng plastik. Ang pagpapatupad ng mga bayaring ito ay tutustusan ng bagong antas ng imprastraktura sa pamamahala ng basura.###
PLASTIC RECYCLING FACILITY PINASINAYAAN NG MONDELEZ PHILIPPINES SA PARAÑAQUE
Nina: Khryzz Daynata at Alfredo Patriarca, Jr.
Mga kuha ni Alfredo Patriarca, Jr.
KASABAY ng pagdiriwang ng ika-60 anibersaryo ng Mondelez Philippines, pinasinayaan nila ang isang plastic recycling facility sa Parañaque City upang makatulong sa lungsod. Ang pasilidad ay gagamit ng teknolohiya mula sa Green Antz Builders upang magawang ecobricks ang lahat ng makukulektang plastic sa lungsod. Ang ecobricks ay gagamiting construction materials.
​
Susuportahan ng Philippine Business for Social Progress (PBSP) ang pamamahala at operasyon ng pasilidad na isa sa paraan ng Mondelez Philippines upang maipakita ang pagsunod sa Extended Producer Responsibility (EPR) law. Layunin ng paggamit ng Plastic Recycling facility na mabawasan ang dami ng mga plastic na itinatapon sa mga landfills at waterways.
​
Sa pamamagitan ng pagdurog ng mga plastic at paghalo sa semento ay makakagawa ng ecobricks. Ang pasilidad ay makakatulong din sa layuning makalikha ng kapakinabangan mula sa mga plastic. Higit sa lahat, mababago ng pasilidad ang kaisipan na ang plastic ay basura dahil magkakaroon na ito ng halaga. ###
BALITANG KALINANGAN
Miyerkules, Mayo 31, 2023
TAGUMPAY NG IKA-20 TAONG PAGDIRIWANG NG BUWAN NG PAMANA DAHIL NA RIN SA MGA PINOY
Ni: Patrick Garin
Mga larawan mula sa Komite ng Buwan ng Pambansang Pamana 2023
MAKULAY ang naging pagdiriwang at pagtatapos ng ika-20 taon ng Buwan ng Pambansang Pamana 2023 o National Heritage Month (NHM) 2023 na may temang “Pamana: Pagbabago at Pagpapatuloy.” Binigyang buhay ang nasabing selebrasyon sa pamamagitan ng masigasig na pakikilahok ng bawat Pilipino sa iba't ibang aktibidad, face-to-face man ito o online.
​
Nahati sa apat (4) na paksa ang pagdiriwang para sa taong ito. Nariyan ang Sustainable Heritage Management (Sustenableng Pangangasiwa ng Pamana), Heritage Science (Pamanang Agham), Intangible Heritage (Protektadong Pamana), at Urban Heritage (Pamanang Pangkabihasnan). Bagama't magkakaiba ang tinatalakay sa bawat paksa, iisa naman ang layunin nito. Walang iba kundi isabuhay sa bawat mamamayang Pilipino ang kamalayan, paggalang, at pagmamahal sa mga pamana ng kasaysayan ng kultura ng bansa at kung paano ito pauunlarin.
​
Ilan sa mga aktibidad na idinaos sa buong buwan ng Mayo ay ang mga sumusunod:
1) Virtual 360 Tour sa Museo San Agustin (Pagpasyal sa Museo ng San Agustin)
2) "Contra Mundum" na isang konsiyerto ng NCCA na ipinalabas sa kanilang Facebook page at live mula sa Metropolitan Theater
3) SInupan Kamustahan 3 sa pamamagitan din ng NCCA Facebook page live
4) Tirahan ng Kasaysayan: Aguinaldo Shrine Legacy to Philippine Independence (Legasiya ng Bantayog ni Aginaldo sa Kasarinlan ng Pilipinas)
5) Capacity Building Management Clinic sa San Carlos City, Pangasinan. (Pagsasanay sa Pagtataguyod ng Kapasidad sa Pangangasiwa ng Pamana)
​
Pormal na pinasimulan ang mga aktibidad na ito noong ika-2 ng Mayo sa pangunguna ni Commisioner on Cultural Heritage Dr. Ivan Anthony Henares.
​
Nababaling ang isipan ng mga tao sa pagpapahalaga sa kultura ng Pilipinas tuwing Buwan ng Pambansang Pamana. Ipinagdiriwang ito taun-taon tuwing buwan ng Mayo matapos itong ideklara sa ilalim ng Proclamation No. 439, s.2003. Layunin ng selebrasyong ito na ipagmalaki ang kultural na pamana at ari-arian ng bansa sa pamamagitan ng pagpapahusay ng panlipunang kapital, pagpapalakas at pagpapalago ng ekonomiya, at pagpapanatili ng maayos na kapaligiran.
​
Makakamtam ang lahat ng layuning ito dahil na rin sa masigasig na pakikipagtulungan ng administrasyon ni Pangulong Ferdinand E. Marcos Jr., at iba pang sangay ng gobyerno. Maayos na nairaos ang pagdiriwang ng NHM 2023 para na rin mapanatili ang kultural na pamana ng ating bansa at mapreserba ang mga ito.
​
"Pinalalakas ng pamana ang nasyonalismo at pinagbubuklod ang mga tao". Ito ang naging pahayag ni National Commission for Culture and the Arts (Pambansang Komisyon para sa Kultura at mga Sining) o NCCA Chairperson Victorino Mapa Manalo patungkol sa pagdiriwang ng Buwan ng Pambansang Pamana. Kaya naman nananawagan ang NCCA sa buong pamahalaan at lipunan na makiisa sa paggunita ng National Heritage Month.
​
Nakiisa rin ang Pambansang Aklatan ng Pilipinas sa Pambansang Komisyon para sa Kultura at mga Sining at sa Pambansang Komite sa Pamana sa pagdiriwang ng Buwan ng Pambansang Pamana 2023 upang bigyang-pansin at ipagdiwang ang kultura at pamana ng Pilipinas. Itaas ang kamalayan ng publiko tungkol dito at hikayatin ang mga tao na yakapin ang kanilang pagkakakilanlang Pilipino.###
FILIPINO RESILIENCE O KATATAGAN NG PILIPINO SA GITNA NG BAGYONG 'BETTY'
Ni: Khryzz Daynata
BAGAMAT walang eksaktong panahon kung paano nabuo ang konsepto ng “Filipino resilience” o ang katatagan ng mga Pinoy sa gitna ng krisis, napakarami nang pagkakataon na napatunayan ito mula sa mga giyera, bagyo, pagputok ng bulkan at iba pang kalamidad.
​
Sa mga trahedya at mahihirap na sitwasyon, sadyang nasusubok ang tibay ng mga Pilipino. Nitong mga nakalipas na araw, muling sinubok ang kahandaan ng bansa at katatagan ng Pinoy sa gitna ng pananalasa ng malakas na bagyong "Mawar" na labis na puminsala sa Guam bago makapasok sa teritoryo ng Pilipinas nitong Sabado, Mayo 27, 2023 at tinawag na "Betty" bilang lokal na pangalan nito.
​
Bago pa man makapasok sa bansa ang sobrang lakas na bagyo ay puspusan ang naging paghahanda ng iba’t ibang sangay ng gobyerno kabilang ang Pambansang Tanggapan sa Pagtugon sa Kalamidad (National Disaster Risk Reduction and Management Council o NDRRMC), Tanggapan ng Tanggulang Sibil (Office of Civil Defense o OCD), Kagawaran ng Kagalingan at Pagpapaunlad Panlipunan (Department of Social Welfare and Development o DSWD), Pangasiwaan ng Pilipinas sa Serbisyong Atmosperiko, Heopisiko at Astronomiko (Philippine Atmospheric Geophysical and Astronomical Services o PAGASA), Pambansang Pulisya ng Pilipinas (Philippine National Police o PNP) at Sandatahang Lakas ng Pilipinas (Armed Forces of the Philippines o AFP).
​
Inilatag ang mga plano at mga dapat gawin sa iba’t ibang lugar sa bansa partikular na ang mga rehiyon na dadaanan ng bagyo upang matiyak na mababawasan ang epektong idudulot ng nito. Sa utos ni Pangulong Ferdinand “Bongbong” Marcos Jr., sama-samang isinakatuparan ng mga ahensya ng gobyerno ang mga inilatag na paghahanda upang maibsan ang pananalasa ni Betty.
​
Bukod sa ilang insidente ng pagkasira ng ilang kabahayan sa baybayin ng Baler at Cagayan, maliit lamang ang inisyal na epekto ng bagyong "Betty". Katunayan, sinabi ng tagapagsalita ng NDRRMC na si Bernardo Rafaelito Alajandro IV na posibleng tapos na ang bantang panganib ng bagyong "Betty" kasunod ng tuloy-tuloy na pagtahak nito sa direksyon palabas ng teritoryo ng Pilipinas.
​
"I think so kasi pataas na siya ngayon e, kasi Tuesday na, yung bagong bulletin nga medyo ano na, lampas na siya ng Batanes,” pahayag ni Alejandro. Wala rin aniyang naiulat na malaking pinsala ang bagyo kumpara sa kanilang inaasahan at tila sinubok lamang ang kahandaan ng gobyerno sa pagtugon sa ganitong uri ng kalamidad.
​
“We're very happy na ganun lang ano, wala namang grabeng na-damage talaga, so all in all I think ano lang siya, kung pwede kung sabihin e parang nag-e-exercise lang tayo of our protocols, procedures,” paliwanag ng opisyal.
​
Nitong Martes, umakyat na sa 11,264 katao na katumbas ng 2,859 pamilya ang naapektuhan ng pananalasa ng bagyong "Betty" sa 55 barangay sa Caraga, Gitnang Luzon, Kanlurang Visayas at Rehiyong Administratibo ng Cordillera (Cordillera Administrative Region o CAR).
​
Sa tala ng NDRRMC, 3,483 katao o 877 pamilya ang pansamantalang nanunuluyan sa 21 evacuation centers habang 381 katao o 112 pamilya ang lumikas sa ibang lugar. Dalawang bahay din sa Gitnang Luzon ang iniulat na nasira. Nasa 104 domestic flights at 17 international flights din ang kinansela sa Kalakhang Maynila dahil sa bagyo.
Umabot din sa 222 pasahero at 122 rolling cargoes ang na-stranded dahil sa pansamantalang pagpapatigil sa operasyon ng 47 daungang pandagat sa Calabarzon, Mimaropa, Bicol, Kanlurang Visayas at Silangang Visayas. Nasa 254 klase sa eskwelahan at 80 trabaho ang sinuspinde dahil pananalasa ng bagyo.
Sa pinakahuling ulat., sumampa na sa P1,897,764 halaga ng tulong ang naipamahagi sa mga naapektuhan ni "Betty".
Nakapagtala din ang NDRRMC ng kawalan ng kuryente, pagguho ng lupa at mga nasirang bahay. Sa Arakan, Cotabato, isang malapad na kalsada ang isinara matapos matabunan ng gumuhong bato at lupa.
Apat na bahay din ang nasira dahil sa malakas na hangin sa General Santos City. Wala namang naiulat na nasaktan sa insidente. Sa Baler, Aurora, apat na bahay din ang nawasak dahil sa dahil sa storm surge at mataas ng lebel ng tubig.###
BALITANG KALINANGAN
Sabado, Mayo 27, 2023
PNP AT AFP HANDA NA KAY
BAGYONG 'BETTY'
Ni: Khryzz Daynata
Mga larawan mula sa PNA, PTV4, AFP at PNP
NAKAHANDA na ang pamunuan ng Pambansang Pulisya ng Pilipinas (Philippine National Police o PNP) at Sandatahang Lakas ng Pilipinas (Armed Forces of the Philippines o AFP) sa pagpasok ng bagyong "Betty" sa teritoryo ng Pilipinas.
​
Ayon sa ulat, aabot sa 22,000 pulis at 12,000 sundalo na bihasa sa pagtugon sa kalamidad ang nakatalaga na ngayon sa mga lugar na inaasahang dadaanan ng bagyong "Betty" na may pandaigdigang pangalan na "Mawar". Nauna rito, tumulong na rin ang PNP sa pagsasagawa ng mga pagpapalikas sa mga residente upang maiwasan ang peligrong hatid ng bagyo.
​
Isang araw bago ang inaasahang pananalasa ng bagyong "Betty" kahapon, nagpadala na ng pagkain ang DSWD sa probinsya ng Batanes. Sa tulong ng Philippine Airforce, inilipad ang nasa nasa 850 pagkaing pangpamilya mula paliparan ng Tuguegarao at sakay ito ng C-130 na sasakyang panghimpapawid. Isa ang Batanes sa mga probinsya sa Hilagang Luzon na inaasahang dadaanan ng bagyo.
​
Kaugnay nito, inalerto na rin ng AFP sa mga lugar na inaasahang maapektuhan ng bagyo ang kanilang yunit na nakatalaga sa paghahanap, pagliligtas at pagbawi sa mga mabibiktima ni "Betty". Sa datos ng AFP, 12,000 sundalo at reserbadong CAFGU ang magsisilbing unang tagaresponde sa pananalasa ng bagyo.
​
Handa rin daw nilang gamitin ang nasa 3,000 kagamitang panglupa, panghangin at pangkaragatan kung kinakailangan. Sa panig ng PNP, sinabi ni PNP-PIO chief Brig. Gen. Red Maranan na nakaposisyon na rin ang kanilang mga kagamitan at tauhan sa lugar na maapektuhan ni "Betty".
​
Aniya, pawang mga may malawak na kasanayan ang mga pangkat tagapagligtas na itinalaga nila sa mga lugar na dadaanan ng bagyo. Nakatutok aniya ang PNP sa mga delikadong lugar na posibleng makaranas ng pagbaha at pagguho ng lupa. Nakikipag-ugnayan na rin daw sila sa mga lokal na pamahalaan para sa pagpapatupad ng sapilitang pagpapalikas bago pa man ang pananalasa ng bagyo.###
365 RESIDENTE NG QC, BINIGYAN NG TULONG PANGKABUHAYAN
Ni: Patrick Garin
Mga larawan mula sa Pamahalaang Lungsod ng Quezon
LUNGSOD NG QUEZON - Pinangunahan kamakailan ni Mayor Joy Belmonte ang pagbibigay ng sertipikasyon ng paggawad ng permanenteng puwesto para sa 365 residenteng mga manininda ng lungsod.
​
Kasabay nito ang pagkakaloob mismo sa kanila ng mga puwesto sa mga palengke na pag-aari ng lokal na pamahalaan - ang Pangpublikong Pamilihan ng Murphy at Pangpublikong Pamilihan ng Roxas.
​
Isa ito sa mga paraan ng Lungsod ng Quezon upang protektahan ang mga mamimili, suportahan ang mga manininda, at mawala ang iligal na nagtitinda sa lungsod.
​
Personal na inabot ang mga sertipiko nina Mayor Joy Belmonte, Vice Mayor Gian Sotto, District 6 Councilor Vic Bernardo, Business Permits and Licensing Department Head Margarita Santos, Market Development and Administration Department Action Officer Perry Dominguez, District 3 Action Officer Atty. Thomas De Castro, at District 4 Action Officer Al Flores.###
BALITANG KALINANGAN
Biyernes, Mayo 26, 2023
PANGALAGAAN ANG KINABUKASAN NG KABATAAN PANAWAGAN NI VP SARA
Ni: Patrick Garin
VP Duterte kasama sina Manila Mayor Honey Lacuna, DepEd Spox/COS Michael Poa , at mga opisyal t kawani ng Pambansang Museo
HINIMOK ni Bise Presidente Sara Duterte ang mga pinuno, stakeholder at pribadong sektor na pangalagaan ang kinabukasan ng mga bata at makipagtulungan sa gobyerno at mga katuwang sa pag-unlad upang matiyak ang layunin ng bansa sa edukasyon. Ang Pangalawang Pangulo, na siya ring Kalihim ng Edukasyon, ay gumawa ng panawagan sa Department of Education (Kagwaran ng Edukasyon) Partners Convergence sa National Museum (Pambansang Museo) noong Huwebes.
​
“Bigyan natin ng pagkakataon ang mga batang Pilipino na makipagkumpitensya sa pantay na larangan ng laro kasama ang iba pang bahagi ng mundo. Sila ang kinabukasan ng ating bansa, at ang pamumuhunan sa kanilang edukasyon ngayon ay magdudulot ng malaking benepisyo sa ating bansa sa mga darating na taon,” ani Duterte.
​
Binigyang-diin din niya ang MATATAG Agenda ng Kagawaran ng Edukasyon sa batayang edukasyon na nagdedetalye ng mga solusyon sa mga problemang "naging likas sa pangunahing sistema ng edukasyon ng bansa." Sinabi niya na ang MATATAG Agenda ay "umaasa na matigil ang pagdurugo" na naging likas sa pangunahing sistema ng edukasyon sa bansa.
​
"Hindi maikakaila na marami sa mga problemang ito ay malalim na nakaugat sa ating pangunahing sistema ng edukasyon - at ang ilan ay malalim na nakaugat sa kapintasan na kultura ng katiwalian na sumisira sa kinabukasan ng ating mga mag-aaral," sabi ni Duterte. "Ang MATATAG Agenda ay umaasa na matigil ang pagdurugo," dagdag niya.
​
Ang edukasyon, ayon kay Duterte, ay isa sa mga pangunahing priyoridad ng administrasyong Marcos, na makikita sa kasalukuyan nitong pagsisikap sa pagpopondo. Sa 2023 General Appropriations Act, ang sektor ng edukasyon ay tumanggap ng pinakamataas na badyet na may P895.2 bilyon. Mula rito, nakatanggap ang Department of Education o DepEd ng P678.3 bilyon para sa basic education. Ngunit ang mga alokasyong ito para sa batayang edukasyon, ani Duterte, ay hindi sapat upang masakop ang lahat ng mga kinakailangan sa pagkamit ng ating MATATAG Agenda.
​
“Kaya, ang mga kasosyo at stakeholder na nagbabahagi ng ating mga pangako ay mahalaga sa paghahatid ng kalidad, inklusibo, adaptive, matatag, at nakahanda sa hinaharap na batayang edukasyon para sa ating 28 milyong Filipino na mag-aaral sa buong bansa," sabi ni Duterte.
​
Binanggit din ni Duterte ang pandagdag na pondo ng mga local government units (LGUs) para sa basic education sa pamamagitan ng kanilang Special Education Fund (SEF), at ang suportang ipinaabot ng mga dayuhang embahada sa Pilipinas.
​
Idinagdag pa niya na pinahintulutan ng Official Development Assistance (ODA), mula sa iba't ibang international development partners, ang departamento na magpatupad ng mga makabagong programa na inuuna ang interbensyon sa pananalapi, imprastraktura at pasilidad ng paaralan, administrasyon, kurikulum at pagtuturo, yamang tao at pagpapaunlad ng organisasyon, operasyon at pagkuha ng mga kagamitan.
​
“Habang nagsusumikap tayo tungo sa pagkamit ng Sustainable Development Goals sa basic education, dapat nating kilalanin na walang organisasyon o gobyerno ang makakamit ang mga ito nang mag-isa. Kailangan natin ng matibay na partnership na kinasasangkutan ng lahat ng aktor, kabilang ang pribadong sektor, civil society, at lokal na komunidad,” ani Duterte. “Maging matatag tayo sa ating pangako sa pagbuo ng mga matatag na komunidad ng mga mag-aaral,” dagdag niya. ###
MMDA, MMDRRMC NAGHAHANDA NA PARA KAY SUPER TYPHOON 'MAWAR' O 'BETTY'
Nina: Rjhay E. Laurea at Alfredo Patriarca, Jr.
Ang mga inihandang kagamitan ng MMDA bilang preparasyon sa pananalasa
ni Bagyong "Betty".
PINAGHAHANDAAN na ng Pangasiwaan sa Pagpapaunlad ng Kalakhang Maynila (Metropolitan Manila Development Authority o MMDA) at ng Konseho sa Pagtugon sa Sakuna sa Kalakhang Maynila (Metro Manila Disaster Risk Reduction and Management Council o MMDRRMC) ang posibleng pananalasa ng Super Typhoon "Mawar" o Bagyong "Betty" sa lokal nitong pangalan na inaasahang papasok ngayong araw sa Pilipinas.
​
Tiniyak ni MMDA acting chairman at kasalukuyang tagapangulo rin ng MMDRRMC na si Atty. Don Artes na maigting ang kanilang pakikipag-ugnayan sa mga kaukulang ahensiya ng gobyerno at mga lokal na pamahalaan dito sa Kalakhang Maynila bilang preparasyon sa nasabing bagyo.
​
"MMDRRMC members shall monitor round-the-clock weather updates and situations, while disaster response units will monitor potential flooding in flood prone areas and waterways (Ang mga miyembro ng MMDRRMC ay magmamatyag buong araw sa pinakahuling mga kaganapan kaugnay ng lagay ng panahon habang ang mga yunit na nakatalaga sa pagtugon sa sakuna ang magbabantay naman ng maaaring mga pagbaha sa mga lugar na bahain, gayundin, sa ating mga daluyan ng tubig)," sabi ni Artes.
​
Nakaantabay na rin para sa mga itatalaga sa kanilang destino ang Urban Search and Rescue Team (Pangkat Pangkalunsuran Para sa Paghahanap at Pagliligtas) ng MMDA na binubuo ng 20 tagapagligtas (rescuers) na sinanay sa paghahanap sa katubigan at sa operasyon ng pagliligtas. Kumpleto rin sa kagamitan ang mga tagapagligtas na ito tulad ng life vests, wet suits (damit pangbasa), boats (bangka), at water rescue helmets (helmet sa pagliligtas sa tubig) habang inililigtas ang mga magiging biktima ng bagyo. Mayroon din silang rescue cans, throw ropes (lubid), at life buoys upang maalalayan ang mga biktimang maililigtas habang nasa tubig.
​
Sinabi ni Artes na natukoy na nila ang mga lugar na kritikal sa pamamagitan ng pakikipag-ugnayan nila sa mga lokal na pamahalaan ng Kalakhang Maynila para na rin sa posibleng mobilisasyon ng mga tao at ari-arian sakaling magkaroon ng pagbaha.
​
"Teams are prepared, equipped, and trained. Communication lines are open with the LGUs so that teams will be immediately dispatched if needed (Ang lahat ng pangkat ay nakahanda, may kagamitan at kasanayan. Bukas ng linya ng komunikasyon sa mga lokal na pamahalaan para kaagad na maipadala ang mga pangkat na ito sakaling kakailanganin)," sabi pa ni Artes.
​
Kabilang sa ilang mga kagamitan at pasilidad na nakahandang maipadala ng MMDA ay ang rubber boats (bangkang gawa sa goma, aluminum boats (bangkang gawa sa aluminum), fiberglass boats (bangkang gawa sa fiberglass), life vests, rescue vehicles (sasakyang pangligtas), at mga trak ng militar. Lahat ng bangka ay may life vests alinsunod sa bilang ng pasaherong kakayanin nitong isakay.
​
Nakipagpulong kahapon si Artes sa lahat ng opisyal ng mga miyembrong ahensiya ng MMDRRMC at sa mga opisyales ng mga lokal na konseho sa pagtugon sa sakuna sa isinagawang pulong-pagtatasa upang talakayin ang kahandaan sa pagtugon sa hanging habagat na mas pinalakas pa ng Bagyong "Betty".
​
Kasama rito ni Artes ang MMDRRMC senior vice chairperson at direktor pangrehiyon sa Kalakhang Maynila ng Tanggapan ng Tanggulang Sibil (Office of Civil Defense o OCD) na si G. Romulo M. Cabantac Jr. Tumutok ang talakayan sa pagtugon sa mga posibleng maging epekto ng bagyo at habagat sa rehiyon at ang pagtiyak na magiging epektibo ang mga pagtugon na ito.
​
Sa nasabing pulong na ginanap sa bagong gusali ng MMDA sa Lungsod ng Pasig, iniulat ng Kagawaran ng Agham at Teknolohiya-Pangasiwaan ng Pilipinas sa Serbisyong Atmosperiko, Heopisiko at Astronomiko (Department of Science and Technology-Philippine Atmospheric, Geophysical, and Astronomical Services Administration o DOST-PAGASA) ang pinakahuling lagay ng panahon at ang mga delikadong sitwasyon. Iniulat naman ng Kagawaran ng Interyor at Pamahalaang Lokal (Department of Interior and Local Government o DILG), Kagawaran ng Kagalingan at Pagpapaunlad Panlipunan (Department of Social Welfare and Development o DSWD), DOST, at ng OCD-NCR ang mga isinasagawa nilang paghahanda.
​
Samantala, iniulat naman ng Pangasiwaan ng Tubig at Alkantarilya sa Kalakhang Maynila (Metropolitan Waterworks and Sewerage System o MWSS) ang nakaambang krisis sa tubig dulot pa rin ng El Niño phenomenon. ###
QC SERVICE CARAVAN PATULOY ANG PAGLILINGKOD SA QCITIZENS
Ni: Patrick Garin
LUNGSOD NG QUEZON - Patuloy ang pag-arangkada ng Quezon City Services Caravan sa Distrito 4, Barangay Obrero kahapon. Hatid ng caravan ang mga serbisyo ng lokal na pamahalaan na handog ni Mayor Joy Belmonte. Umiikot ang QC Services Caravan sa buong lungsod upang mas ilapit pa ang mga programa at serbisyong para sa mga QCitizen.
​
Maaaring ma-access ng mga residente ang mga serbisyo ng iba't ibang mga opisina at departamento ng lungsod katulad na lamang ng mga sumusunod:
​
1. City Mayor District 4 Action Office (OCM-District 4)
2. Office of the Vice Mayor (OVM)
3. Office for the Senior Citizens’ Affairs (OSCA)
4. Persons with Disability Affairs Office (PDAO)
5. Social Services Development Department (SSDD)
6. Quezon City Youth Development Office (QCYDO)
7. Housing, Community Development and Resettlement Department (HCDRD)
8. Public Employment Service Office (PESO)
9. Quezon City Health Department (QCHD)
10. City Civil Registry Department (CCRD)
11. City Veterinary Department (CVD)
12. Department of the Building Official (DBO)
​
Para mabatid kung saan ang susunod na lokasyon ng Quezon City Services Caravan ay sumubaybay lamang sa mga opisyal na social media accounts ng Lungsod Quezon.###
BALITANG KALINANGAN
Huwebes, Mayo 25, 2023
ABALOS: TUTUKAN NG BFP ANG IMBESTIGASYON SA PAGKASUNOG NG MANILA CENTRAL POST OFFICE
Ni: Patrick Garin
Ang nasunog na Manila Central Post Office
Sec. Abalos
PINATUTUTUKAN ni Department of the Interior and Local Government (DILG) Secretary Benjamin “Benhur” Abalos, Jr. sa Bureau of Fire Protection (BFP) ang pag-iimbestiga sa naganap na sunog sa Manila Central Post Office.
Idineklarang fire out ang sunog sa makasaysayang gusali 6:33 ng umaga ngayong Martes–mahigit 30 oras matapos umakyat sa First Alarm ang sunog na nagsimula sa basement ng gusali bandang 11:41 ng gabi nitong Linggo.
“We must get to the bottom of this unfortunate incident at all costs and at the soonest possible time. That is why I am calling on the BFP to prioritize the investigation of the Manila Central Post Office fire and exhaust all means necessary to find out the cause of this incident that destroyed one of the country’s architectural heritage and national historical landmarks (Kailangan malaman natin ang puno't dulo ng insidenteng ito sa lalong madaling panahon. Kaya naman nananawagan ako sa BFP na bigyang prayoridad ang imbestigasyon ng sunod sa Manila Central Post Office at gawin ang lahat ng makakaya para malaman ang sanhi ng insidente na tumupok sa isa sa pamanang arkitektura ng bansa at isang pambansang makasaysayang lugar),” sabi ni Abalos.
Batay sa ulat ng BFP, nagsimula ang apoy sa basement ng gusali kung saan nakaimbak ang ilang materyal na gawa sa papel at kahoy. Umabot ito sa mga sumunod na palapag at natupok ang iba't ibang kagamitan sa loob ng gusali, kabilang ang mga parcel at ilang national identification card. Tinatayang mahigit P300 milyon ang naging pinsala ng sunog, ayon sa awtoridad.
Nagpasalamat at nagbigay-pugay naman si Abalos sa mga BFP personnel at fire volunteers na rumesponde at tumulong sa pag-apula ng apoy. Ayon sa pinakahuling ulat, 18 ang nasaktan sa sunog kabilang ang 17 tauhan ng BFP at fire volunteers.
“I commend the gallant men and women of the BFP, as well as our volunteer firefighters who have shown heroism and courage in the face of adversity (Pinupuri ko ang ating matitikas na kalalakihan at kababaihan sa BFP, gayundin ang ating mga boluntaryong mga bumbero na nagpakita ng kabayanihan at katapangan na harapin ang hirap [ng pag-apula sa sunog]). Hindi matatawaran ang inyong kabayanihan kaya naman sumasaludo ako at taos-pusong nagpapasalamat sa inyong lahat,” ani ng Kalihim.
Inatasan ni Abalos ang pamunuan ng BFP na tiyaking mabibigyan ng kaukulang tulong at assistance ang mga BFP personnel at fire volunteers na nasaktan sa naturang insidente. ###
VP SARA INIHALINTULAD ANG NPA SA DEMONYO
Ni: Patrick Garin
Imbak na larawan ng mga Dabawenyo na sinusunog ang bandila ng NPA. Larawan mula sa PNA.
VP Duterte
LUNGSOD NG DAVAO — Sinabi ni Vice President Sara Duterte na nagapi na ng mga Dabawenyo ang New People’s Army, na inihalintulad niya sa demonyo nitong Miyerkules, Mayo 24.
​
“Isang taon na ang nakalipas ngayon, tayong mga Dabawenyo ay inangkin ang ating kalayaan. Kalayaan mula sa tanikala ng isang grupo na sa loob ng mga dekada, sa pamamagitan ng madugong armadong pakikibaka, ay nagpatuloy sa isang siklo ng karahasan na nag-trap sa maraming mahihirap na pamilyang Pilipino, lalo na ang mga naninirahan sa kanayunan tulad ng ating mga kapatid na lumad,” sabi ni Duterte sa panahon ng Insurgency-Free Davao City First Anniversary Celebration sa Rizal Park dito noong Miyerkules.
​
Sa kanyang 13-minutong mensahe, sinabi ni Duterte na ang New People’s Army ay tatlong salita na "minsan ay iniwasan niyang banggitin" dahil ayaw niyang bigyang-dangal ang presensya nito o kilalanin ang kapangahasan ng mga teroristang gawain nito sa nakalipas na 53 taon.
​
“Ngunit natanto ko na kailangan nating pag-usapan ang tungkol sa diyablo. Ngunit magsalita tungkol sa diyablo hindi nang may takot kundi may determinasyon, katapangan, tiyaga ng mga tunay na makabayan na determinadong ipagtanggol ang ating kapwa Pilipino, partikular ang ating mga anak, at ang ating tinubuang-bayan,” ani Duterte.
​
“Kailangan nating magsalita tungkol sa diyablo kung matatalo lang ang diyablo. And we did,” dagdag niya. Binanggit ni Duterte ang mga nagawa ng mga lokal na pinuno at mga law enforcement units laban sa communist insurgency.
​
Pinasalamatan din niya ang peace advocate at adviser na si Inday Irene Santiago sa pagiging babae sa likod ng Peace 911 Project na tumulong sa pamahalaang lungsod ng Davao sa pagbabago ng tanawin ng kaguluhan sa Paquibato tungo sa isang tanawin ng kapayapaan.
​
“Ang programang Peace 911 na pinamumunuan ng sibilyan ay nanalo sa puso ng mga mamamayan ng Paquibato sa pamamagitan ng mga proyekto at programa na nag-aalok sa kanila ng pagkakataong maging produktibo, nagbigay sa kanila ng kabuhayan, nakatuklas sa kanila ng mga bagong kasanayan, may kakayahang kababaihan, at nagtayo ng kanilang kumpiyansa bilang indibidwal at bilang isang komunidad,” ani Duterte.
“Ang Peace 911 ay isang tool na nagbibigay kapangyarihan. Isang kasangkapan sa edukasyon. Ito ang nagbigay-daan sa mga taga-Paquibato na i-unmask ang kanilang mga kaaway,” dagdag pa nito. Mula nang ilunsad ang Peace 911 sa Paquibato District noong alkalde pa si Duterte, idineklara nang “insurgency-free” ang Davao City.
​
Kinuwento niya kung paano binago ng Peace 911 ang malayong komunidad sa Paquibato District ng lungsod na dating isang "kuta" ng NPA. Binanggit din ni Duterte ang pagkamatay ng apat na buwang batang babae sa Talakag, Bukidnon sa pananambang ng NPA noong Nobyembre 2016, at pagkamatay ng isang fish vendor na namatay limang araw matapos ma-comatose nang tamaan ng landmine na ginawa ng terorista. Nagpasabog ang NPA sa Barangay Mandug noong Mayo 2017.
​
"Ang terorismo ay isang mapanganib na kaaway. Ang NPA, for one, walang pakialam kung miyembro ka ng military, police, o civilian body,” ani Duterte. “Totoo ang banta ng isang teroristang grupo tulad ng NPA sa buhay ng mga Pilipino, sa kinabukasan ng ating mga anak, at sa ating pinakamamahal na demokratikong mithiin,” dagdag niya.
​
Nanawagan si Duterte, na siya ring Education Secretary, sa mga tao at mga dating rebelde na laging tiyakin na ang mga bata ay papasok sa paaralan para maabot nila ang kanilang mga pangarap, at gawin ang mga bagay na gusto nilang gawin sa kanilang buhay at para sa kanilang pamilya.
​
Ibinahagi niya ang kasalukuyang institusyonalisasyon ng Kagawaran ng Edukasyon sa pambansang kurikulum ng kapayapaan upang ituro sa mga bata ang halaga ng kapayapaan at upang matuto nang higit pa tungkol sa paglutas ng mga salungatan at hindi karahasan.
​
“Gabayan natin ang ating mga anak na maging mga katalista ng pagkakaisa, pag-unlad, at pangmatagalang kapayapaan sa ating mga komunidad,” ani Duterte.
​
“Ang edukasyon, gaya ng alam natin, ay nagtataglay ng kapangyarihang makapagpapabago sa takbo ng ating buhay at ng ating kapwa. Ito ay isang kasangkapan na makapagpapalaya sa atin mula sa kahirapan o kawalan ng katarungan. Isa rin itong makapangyarihang tool para sa peacebuilding at paglaban sa terorismo,” dagdag niya.
​
Tinapos ni Duterte ang kanyang mensahe sa pamamagitan ng panawagan na ipagpatuloy ang aktibong pagsusumikap sa pagbuo ng kapayapaan at huwag talikuran ang lakas ng bansa bilang isang komunidad at ibinahaging mga pangarap bilang isang bansa.
​
“Habang sumusulong tayo, umaasa ako na isang araw sa lalong madaling panahon, magising tayo sa balita na ang buong Pilipinas ay NPA terrorist-free na,” ani Duterte. "Let us make this happen!" dagdag pa ng Bise Presidente.###
5 PINOY KASAMA SA 39 NA NASAWI SA PAGLUBOG NG CHINESE FISHING VESSEL SA CENTRAL INDIAN OCEAN
Ni: Khryzz Daynata
KINUMPIRMA ng Philippine Coast Guard o PCG na kabilang ang limang Pinoy sa 39 crew members na nasawi sa paglubog ng Chinese fishing vessel sa Central Indian Ocean nitong nakaraang linggo. Agad na nakiramay ang PCG sa naiwang pamilya ng mga biktima matapos na iulat ni China Transport Minister Li Xiaopeng ang pagkasawi ng lahat ng crew members ng fishing vessel.
​
“We are saddened by this development. Since day one, we have been monitoring and coordinating with the Australian Maritime Rescue Center and the Chinese Embassy as to the progress of the search and rescue (SAR) operations (Nalulungkot kami sa balitang ito. Simula unang araw pa lang, mino-monitor na namin at nakikipag-ugnayan na kami sa Australian Maritime Rescue Center at sa Chinese Embassy sa kung ano na ang naging progreso ng operasyon sa paghahanap at pagliligtas [sa mga crew members])," pahayag ni PCG Spokesperson, CG Rear Admiral Armand Balilo.
Lulan ng fishing vessel na tumaob at lumubog noong Mayo 16 ang 17 Chinese, 17 Indonesians at limang Pinoy. Nakipag-ugnayan na rin ang PCG sa Department of Foreign Affairs kung paano sila makakatulong sa pamilya ng mga nasawing crew members. "We are coordinating with the Department of Foreign Affairs, to know how we can assist the affected families during this difficult time," dagdag ni Balilo.
​
Pinasalamatan din ng PCG ang Australian search and rescue teams sa kanilang ginagawa upang makita ang mga crew members. "We thank the Australian SAR teams for their efforts, as we understood the risks they faced while scouring the vast waters amid unpredictable weather conditions (Nagpapasalamat kami sa Australian SAR teams sa kanilang pagsisikap dahil nauunawaan namin ang peligro na kanilang hinaharap habang sumusuong sa karagatan sa kabila ng hindi matantiyang kalagayan ng panahon)," pahayag ng opisyal.
​
Samanatala, 14 na bangkay ang nadiskubre ng Sri Lankan Navy sa loob ng lumubog na Chinese fishing vessel matapos na ideklarang patay lahat ang 39 crew members na lulan ng barko.
​
Sinabi ng Department of Foreign Affairs o DFA noong Mayo 18 ay natagpuan ang lumubog na barko sa may 1,000 kilometro timog ng Sri Lanka. Batay sa ulat ng Sri Lankan Navy, dalawang bangkay ang unang na-recover ng mga divers at 14 pa ang namataan nitong Martes.
​
Lubha ring mapanganib sa kalusugan ang pag-recover ng mga bangkay dahil nasa state of decomposition na ang mga ito. "Due to decomposition and the potential health hazards posed by operating in contaminated waters with limited protective gear, it was determined that retrieving those bodies would be exceedingly dangerous (Dahil naaagnas na at posibleng may banta na ito sa kalusugan, ang operasyon sa kontaminadong tubig na may limitadong gamit pang-proteksyon ay napakadelikado)," pahayag ng Sri Lankan Navy. ###
BELMONTE NANAWAGANG PABAKUNAHAN ANG MGA SANGGOL
Ni: Patrick Garin
Isang bata ang binabakunahan habang nakakandong
sa kanyang ina. Larawan mula sa QC-LGU
Mayor Joy Belmonte
HINIMOK ni Quezon City Mayor Joy Belmonte ang mga magulang na pabakunahan ang kanilang mga anak upang maprotektahan sila sa mga sakit na maiiwasan sa bakuna, tulad ng tigdas, rubella, at polio. Noong Mayo 2, idinaos ng Quezon City Health Department ang city-wide na implementasyon ng Chikiting Ligtas Vaccination Program ng Department of Health (DOH) sa Barangay Bahay Toro.
​
Upang higit pang palakasin ang aktibidad ng pagbabakuna, ang mga manggagawang pangkalusugan ay madiskarteng nagtayo ng mga pansamantalang post ng pagbabakuna sa mga pamilihan at mga covered court. Nagsasagawa rin sila ng pagbabahay-bahay para mabakunahan ang mga bata sa pinakamalayong sulok ng mga komunidad.
​
"Bakuna ang pinakamabisa at pinakamatipid na paraan para maprotektahan ang ating mga anak. Kaya bawat eskinita at kalye sa ating lungsod ay sinusuyod ng ating mga health worker para masiguro na bawat bata ay bakunado at protektado mula sa mga vaccine-preventable diseases," sabi Mayor Joy Belmonte.
​
Nilalayon ng lungsod na mabakunahan ng bakuna laban sa tigdas ang 230,347 bata na may edad na limang taon pababa (0 hanggang 59 buwan), at 270,977 bata (0 hanggang 59 na buwan) ng oral polio vaccine ngayong buwan. Hinihikayat din ang mga magulang na dalhin ang kanilang mga anak sa pinakamalapit na health center para makakuha ng libreng bakuna.
​
“Kahit matatapos na itong Chikiting Ligtas vaccination activity ngayong Mayo, hindi titigil ang lokal na pamahalaan para bakunahan at protektahan ang ating mga anak mula sa mga sakit na pwede namang maiwasan sa tulong ng mga bakuna,” dagdag ni Belmonte.###
BALITANG KALINANGAN
Miyerkules, Mayo 24, 2023
PAGKAKASUNOG NG MAKASAYSAYANG MANILA CENTRAL POST OFFICE PINAIIMBESTIGAHAN SA KONGRESO
Ni: Rjhay E. Laurea
Rep. De Venecia
Rep. Abante
Ang nasunog na Manila Central Post Office
MAGHAHAIN ng resolusyon si Pangasinan 4th District Rep. Christopher de Venecia at ng iba pang mga mambabatas na miyembro ng Komite sa Malikhaing Industriya at Sining ng Pagtatanghal (House Committee on Creative Industry and Performing Arts) para maimbestigahan ang pagkakasunog ng Manila Central Post Office Lunes ng gabi.
​
Ayon kay De Venecia isang Pambansang Kayamanang Pangkultura (National Cultural Treasure) at Mahalagang Pag-aaring Pangkultura (Important Cultural Property) ang nasabing gusali kung kaya napakahalaga na maimbestigahan ang naging sanhi ng sunog at mabatid ang pagiging epektibo ng mga pag-iingat na isinasagawa para maiwasan na ang kahalintulad na insidente sa hinaharap lalo na sa mga itinuturing na Pambansang Pamana (National Heritage) tulad ng Manila Central Post Office.
​
Binigyang-diin ni De Venecia, tagapangulo ng nasabing Komite, na noong deliberasyon para sa budget, walang sapat na pondo ang institusyon para masustena ang nasabing ari-arian ng pamahalaan.
​
"Thus, we can safely conclude that the agencies that are tasked to maintain the Manila Central Post Office, whether as a post office or as a cultural property, do not have the budget to restore the damage caused by the fire (Dahil dito, maaari na nating ipagpalagay na ang mga ahensiyang nakatoka para pangalagaan ang Manila Central Post Office, bilang isang post office o bilang isang ari-ariang pangkultua, ay walang budget para makumpuni ang mga sira na naidulot ng sunog)," sabi ni De Venecia.
​
"Perhaps, when we discuss the budget again later this year, we can explore increasing these agencies' allocations, specifically for restoration and maintenance of these very important cultural structures (Siguro, sa pagdinig muli para sa budget sa pagtatapos ng taon, maaari nating mapag-aralan ang pagdagdag sa pondo ng mga ahensiyang ito lalo na sa restorasyon at pagpapanatili ng mga mahahalang istrukturang pangkultura na tulad nito)," dagdag pa ng mambabatas).
​
Sa talumpati naman ni Manila 6th District Rep. Bienvenido Abante na dapat na umanong maging panggising sa pamahalaan ang insidenteng ito at nagpahayag siya ng pakikiisa sa paghiling na maimbestigahan ito. Nanawagan din siya na maibalik ang nasabing historical landmark.
​
Nagsimula ang sunog sa Manila Central Post Office sa Lawton, Manila noong at naapula lamang ng mga bumbero noong Martes o higit 30 oras matapos magsimula ang sunog.
​
Ayon kay Senior Inspector Alejandro Ramos, hepe ng seksyon para sa imbestigasyon at intelihensiya ng Bureau of Fire Protection-Manila, ang naging pinakamalaking hamon sa mga bumbero ay ang pagkakakulong ng init sa basement ng nasabing gusali. Lumalabas din sa inisyal na imbestigasyon ng BFP na walang fire suppression system ang gusali na maaring magpabagal sa pagkalat ng apoy habang nasusunog ito.###
PROGRAMANG PANSARAP DINALA NG OVP SA PAARALAN NG BARMM
Ni: Patrick Garin
UPI, MAGUINDANAO — Hinatid ng Office of the Vice President (OVP) at ng Ministry for Basic, Higher and Technical Education ang programang “PanSarap” na isang pandagdag na programang pangnutrisyon para sa mga undernourished na mag-aaral sa Bangsamoro Autonomous Region in Muslim Mindanao (BARMM) nitong Martes, Mayo 23.
​
May kabuuang 1,064 undernourished na kindergarten hanggang grade 6 na mag-aaral ng Nuro Central Elementary School sa Upi, Maguindanao ang benepisyaryo ng programa. Sa loob ng 30 araw, bibigyan sila ng masustansiyang tinapay na binuo ng Department of Science and Technology (DOST) sa pamamagitan ng Food and Nutrition Research Institute (FNRI).
​
Ang tinapay na PanSarap, lahat ay Halal certified, at may 10 lasa. Ang mga buns ay pinatibay ng mga sustansiyang tulad ng vitamin A, energy, protein, calcium, at iron.
​
Noong nakaraang buwan, ang PanSarap Program ay hinatid din sa mahigit 733 mag-aaral na undernourished kindergarten hanggang sa nasa ika-6 na baitang ng Lower Tamugan Elementary School sa Davao City.
​
Plano rin ng OVP na dalhin ang programa sa iba pang bahagi ng bansa na may mataas na kaso ng malnutrisyon sa mga bata. ###
KAUNA-UNAHANG GREEN AWARDS SA BANSA INILUNSAD NG QC
Ni: Patrick Garin
Mayor Joy Belmonte kasama ang iba pang QC Officials sa paglulunsad ng Green Awards
PARA hikayatin ang mas maraming QCitizens na makibahagi sa climate action ng lungsod at isulong ang mga pagsisikap nito sa disaster resiliency at environmental conservation, opisyal na inilunsad ng Quezon City Government ang unang Green Awards sa bansa nitong Martes, Mayo 23.
​
Kinikilala at binibigyang-insentibo ng Quezon City Green Awards ang mga barangay, sangguniang kabataan (SK), mga organisasyong nakabase sa kabataan, at mga negosyo na nagpapatupad ng mga hindi matatawaran at inklusibo na mga programa sa disaster risk reduction at climate action.
​
"Ang pagtutulungan ng komunidad at iba't ibang stakeholder ay may malaking papel sa paghahanda sa sakuna at pagtugon sa masamang epekto ng krisis sa klima," sabi ni Mayor Joy Belmonte.
​
Lahat ng barangay, sangguniang kabataan, youth-based organizations, at negosyo ay maaring lumahok sa QC Green Awards. Mayroon itong tatlong kategorya – Green Award, Resiliency Award, at Green and Resilient Champion.
​
Kinikilala ng Green Award ang mga institusyon na gumawa ng makabuluhang kontribusyon sa pagtugon sa pagbabago ng klima at pagsusulong ng mga napapanatiling kasanayan, habang ang Resiliency Award ay nagbibigay-parangal sa mga hakbangin na nagpapakita ng katatagan, paghahanda, at pagtugon sa harap ng natural o gawa ng tao na mga sakuna. Sa kabilang banda, ang Green and Resilient Champion Award ay ibibigay sa mga negosyo at barangay na nagpasimula ng mga natatanging kasanayan na tumatalakay sa mga epekto ng pagbabago ng klima at mga sakuna.
​
Ang mga interesadong kalahok ay kailangang magparehistro sa QC Green Awards microsite (greenawards.quezoncity.gov.ph), at isumite ang lahat ng kinakailangang requirements sa pamamagitan ng opisyal na email address nitong greenawards@quezoncity.gov.ph. Ang pagsusumite ng mga entry ay bukas mula Hunyo 1 hanggang Hulyo 15, 2023.
​
Ang bawat entry ay sasailalim sa intensive assessment at field validation ng mga departamento ng lungsod, sa pangunguna ng Disaster Risk Reduction and Management Office (DRRMO), Climate Change and Environmental Sustainability Department (CCESD), City Administrator's Office, QC Youth Development Office (YDO), Business Permits at Licensing Department (BPLD), at Barangay and Community Relations Department (BCRD). Ang mga finalist ay kailangang ipakita ang kanilang mga programa sa Green Awards pool ng mga hukom.
​
Isang kabuuang labing-anim na huwarang organisasyon at institusyon ang gagawaran ng mga pagkilalang nabanggit sa Oktubre. Makakatanggap sila ng trophy at cash grant na magagamit nila sa kanilang kasalukuyan at paparating na climate action at disaster risk reduction and management projects.
​
Ang mga sesyon ng pagsasanay ay isasagawa din para sa mga target na kalahok upang maging pamilyar sa kanila ang mekanika at proseso ng pagtatasa ng parangal.
​
"Sa QC Green Awards, umaasa kaming maakit ang mas maraming QCitizens sa aming mga pagsisikap tungo sa aming pananaw na magtatag ng isang nabubuhay, luntian, sustenable, at nakatutugon sa klima at kalamidad na kinabukasan para sa lahat," dagdag ng alkalde.
​
Ang Quezon City ay kabilang sa mga nangungunang lungsod sa Pilipinas na nagsusulong ng katarungan sa klima. Noong 2019, idineklara ng lungsod ang isang emergency sa klima na nag-udyok sa pagtatatag ng iba't ibang mga solusyon sa suliranin sa klima at ang pagpasa ng mga landmark na ordinansa para sa kapaligiran.
​
Ang QC din ang nag-iisang lungsod sa Pilipinas na miyembro ng C40 Cities, isang pandaigdigang network ng mga alkalde na nagsasagawa ng agarang aksyon upang harapin ang krisis sa klima at lumikha ng isang kinabukasan kung saan ang lahat ay maaaring umunlad.
​
Maaaring ma-access ang kumpletong mekanika at impormasyon tungkol sa QC Green Awards sa greenawards.quezoncity.gov.ph.####
QC FIRE MARSHAL
PINAIIMBESTIGAHAN NI ABALOS
Ni: Patrick Garin
DILG Secretary Benhur Abalos
IPINAG-UTOS ni Department of the Interior and Local Government (DILG) Secretary Benjamin 'Benhur' Abalos, Jr., ang imbestigasyon kay Quezon City Fire Marshal Aristotle Bañaga bilang tugon sa mga naiulat na paglabag sa mga protocol noong Mayo 17, 2023 sa sunog sa Tandang Sora, QC kung saan binawian ng buhay ang retiradong si Police Brigadier General George Ancheta, Jr.
​
Ang pamangkin ng yumaong heneral na si Quezon City Councilor at Majority Floor Leader Dr. Dorothy "Doray" Delarmente, ay pinabulaanan ang "iresponsableng" pag-uulat ng sunog ng isang mamamahayag ng GMA Network na umano'y nakapanayam ng dalawang survivors, ang asawa at katulong ng yumaong heneral, sa pinangyarihan ng sunog habang gulat at naguguluhan pa rin sila at hindi pa nalalapatan ng pangunang-lunas.
​
Sa isang privilege speech sa QC Council noong Mayo 22, 2023, binatikos din ni Delarmente si Fire Marshal Aristotle Bañaga dahil sa umano'y pagpayag nito sa GMA media team na ma-access ang fire vicinity at ang mga biktima na paglabag sa mga protocol.
​
Kaugnay nito, kahapon ng umaga, kinumpirma ni Bureau of Fire Protection (BFP) Chief Louie Puracan na naglabas na ng show-cause order ang BFP laban kay Fire Marshall Bañaga.
​
"Labis kaming nagmamalasakit sa mental well-being at privacy ng lahat ng survivors. Makatitiyak na iimbestigahan namin ang bagay na ito nang maigi at ipapataw namin ang tamang sanction kung saan kinakailangan," sabi ni Abalos.
​
"Ipinaaabot namin ang aming suporta at pinakamalalim na pakikiramay sa naulilang pamilya at mga mahal sa buhay ni Brig. General Ancheta," dagdag pa ng DILG chief. ###
BALITANG KALINANGAN
Martes, Mayo 23, 2023
MAKASAYSAYANG MANILA CENTRAL POST OFFICE NASUNOG
Ni: Patrick Garin
Personal na tinignan ni Manila Mayor Honey Lacuna (nakatalikod kasama ng bumbero) ang nasunog na Manila Central Post Office . Naka-inset sa larawan ang kuha ng kabuuang nasunog na gusali
TINUPOK ng apoy ang makasaysayang Manila Central Post Office building nitong Linggo, Mayo 21. Itinaas ang unang alarma bandang alas-11:41 ng gabi. Ayon sa Bureau of Fire Protection (BFP), nakontrol ang apoy alas-7:22 ng umaga noong Lunes matapos umabot sa general alarm alas-5:54 ng umaga.
​
Itinaas ito sa 2nd alarm bandang 1:28 a.m.; ikatlong alarma sa 2:17 a.m.; ikaapat na alarma sa 4:28 a.m.; at ikalimang alarma sa 4:32 a.m. Umabot ito sa Task Force Alpha alas-4:36 ng umaga; Task Force Bravo sa 4:45 a.m.; Task Force Charlie alas-5:02 ng umaga; Task Force Delta alas-5:25 ng umaga; at general alarm sa 5:54 a.m.
​
Kalaunan ay sinabi ng BFP na pito ang naiulat na nasugatan at nasa P300 milyong halaga ng mga ari-arian ang maaaring nawala dahil sa sunog. Wala pang naitalang nasawi sa ngayon. Sinabi ng BFP na ang sunog sa Manila Central Post Office ay may kinalaman sa basement ng gusali.
​
Makasaysayan ang nasabing gusali dahil ito ay isa sa mga lubhang napuruhang imprastruktura noong Ikalawang Digmaang Pandaigdig noong Labanan sa Maynila at pagkatapos ay itinayong muli noong 1946 habang pinanatili ang karamihan sa orihinal nitong disenyo.
​
Kaya naman taong 2018 nang ideklara ng National Museum of the Philippines ang Manila Post Office building bilang isang "important cultural property" (ICP), ibig sabihin ay mayroon itong "natatanging kahalagahan sa kultura, sining at kasaysayan ng Pilipinas" na nagpapahintulot dito na makatanggap ng pondo ng gobyerno para sa proteksyon, konserbasyon at pagpapanumbalik nito.###
LA LOMA LECHON FESTIVAL MULING BINUHAY NG QUEZON CITY
Nina: Patrick Garin at Alfredo Patriarca, Jr.
Si Quezon City Mayor Joy Belmotne habang nagtatalumpati sa harap ng mga nakisaya sa La Loma Lechon Festival at ang mga dinamitang lechon sa tradisyunal na Parada ng mga Liston.
LUNGSOD NG QUEZON - Matapos ang tatlong taong pagkawala bunsod ng pandemya na COVID-19, muling idinaos ng Pamahalaang Lungsod ng Quezon ang inaabangang La Loma Lechon Festival. Kasama ang Office of District 1 Rep. Arjo Atayde, at ang La Loma Lechoneros Association (LLA), ibinalik ang festival at ang maraming aktibidad na nauugnay sa dito.
​
"Simula 2000, tuwing ikatlong Linggo ng Mayo, ipinagdiriwang natin ang Lechon Festival dito sa La Loma. Sa kasamaang-palad, pansamantala itong natigil dahil sa pandemya. Kaya naman ngayon, ginawa nating mas makulay, mas bongga at mas masaya ang ating selebrasyon sa Lechon Capital of the Philippines," sabi ni Mayor Joy Belmonte.
​
"Hindi kumpleto ang birthday, graduation, anniversary, o binyag kung wala ang lechon. Kaya rito sa ating lungsod, ibinibida at ipinagmamalaki natin ang 'star' ng mga selebrasyong ito," dagdag ni Mayor Belmonte.
​
Tulad ng mga nakaraang pagdiriwang, kasama sa programa ngayong taon ang parada ng mga naka-costume na lechon at ang muling pag-imbento ng mga pagkaing lechon. Ilang pagtatanghal din ang nasaksihan ng QCitizens, kabilang ang konsiyerto ng QC Symphonic Band. Ipinagdiwang din ng lungsod ang kapistahan ng Patron ng La Loma District na Nuestra Señora de Salvacion.
​
"Maituturing nating haligi na ng mayamang kultura ng Quezon City ang La Loma. For 50 years, hindi maikakaila na isa ito sa mga pinakadinarayong destinasyon sa QC at sa buong Metro Manila," paliwanag ni QC Tourism Department OIC Ma. Teresa Tirona.
​
Unang ipinagdiwang ng Quezon City ang La Loma Lechon Festival noong 2000, nang inilunsad ni dating LLA president Monchie Ferreros (Monchie's Lechon) ang Parada ng mga Lechon. Ito ay lubos na sinuportahan ng pamahalaang lungsod noong 2002 sa ilalim ng administrasyon ni dating Mayor Feliciano "Sonny" Belmonte, sa pamamagitan ng pagsasabatas ng City Ordinance 1221-2002.
​
Noong 2020, sa pamamagitan ng City Ordinance 2961-2020, opisyal na idineklara ng lungsod ang La Loma District bilang isa sa mga Tourism District ng Quezon City upang higit pang makaakit ng mga turista at mapalakas ang aktibidad ng ekonomiya nito.###
QC COUNCILOR UMALMA SA IRESPONSABLENG PAGBABALITA NG REPORTER NG MALAKING TV NETWORK
Nina: Rjhay E. Laurea at Alfredo Patriarca, Jr.
QC Councilor Dorothy "Doray" Delarmente at GMA News reporter Jamie Santos
PINAIIMBESTIGAHAN ni Quezon City Council majority floor leader Councilor Dorothy "Doray" Delarmente ang diumano'y mali-mali at iresponsableng pagbabalita ng isang mamamahayag mula sa malaking TV network kaugnay ng isang sunog sa naganap sa Lungsod Quezon na ikinasawi ng kanyang kaanak.
​
Wala umanong katotohanan ang ibinalita ng mamamahayag na si Jamie Santos ng GMA-7 Network na ang kanyang tiyuhin na si P/Brig. Gen. George Ancheta (Ret.) ay nasawi sa sunog na naganap sa kanilang bahay sa Tandang Sora matapos na bumalik pa raw ito sa loob ng bahay kahit na nakalabas na ito, ayon sa balita ni Santos.
​
Ipinaliwanag ni Delarmente na hindi totoo na nakalabas na ng bahay si Gen. Ancheta at bumalik lamang sa loob ng nasusunog na bahay kaya ito nasawi.
​
"Gusto kong sabihin sa lahat ng nanonood at nakikinig dito ngayon… na ito ay 100% fake news…. false information… pawang kasinungalingan. Oo, ininterview niya ang isa sa mga survivors na kasambahay… pero ang exact words na sinabi nito na kanila pang pinakita sa video ay 'tapos yung asawa niya po, bumalik po sa taas ulit. Hindi na po nakabalik',” paglilinaw ng konsehal.
​
"Kahit bali-baliktarin ko ang sinabi ni Andrew (pangalan ng kasambahay)… wala siyang sinabing 'lumabas ng bahay at bumalik sa loob ng bahay'," dagdag pa nito.
​
Isinalaysay ng konsehal sa kanyang talumpati ang tunay na naganap sa kanyang tiyuhin kung saan lumalabas na naunang pinalabas ni Gen. Ancheta ang kanyang asawa na mag-isa at kasama ang 2 pang kasambahay ay sinubukan pa ng heneral na apulahin ang sunog sa basement ng bahay kung saan ito nagsimula. Ngunit nasawi na nga ang dating opisyal ng Philippine National Police (PNP) sa proseso ng mga pangyayari.
​
Sa isa pang hiwalay na panayam sa radyo, sinabi ng konsehala na isang iginagalang na heneral ang kanyang tiyuhin na tila pinagmukha lang tanga ni Santos sa kanyang maling ulat. Bukod dito, inunahan pa umano ni Santos ang pamilya sa pagbabalita na nasawi na ang heneral kahit na ang pamilya ay nasa mismong insidente.
​
"You (Santos) reported that General Ancheta died on nationwide television without even confirming kung alam na ng kanyang pamilya. Ang asawa niya, na pirming nakatayo sa harap ng bahay… sinisigaw ang pangalan ng kanyang asawa na lumabas na ng bahay ay ilang metro lang ang layo sayo," sabi ng konsehala.
​
Ayon sa konsehal lubhang napakalaki ng epekto ng nagawang ito ni Santos sa pamilya lalo na ng mga nakatatanda nilang mga kaanak. May paraan naman diumano para mas malumanay na isinalaysay ang balita nang hindi masyadong makaaapekto sa kalagayang mental at emosyunal ng mga pamilya at kaanak.
​
Ikatlong ipinunto ni Delarmente ay ang kawalang malasakit na pagbabalita ng mamamahayag kung saan kinapanayam agad nito ang kalalabas lamang na survivor ng sunog kahit hindi pa nabibigyan ng atensiyong medikal.
​
"Ang kasambahay naming si Andrew ay isa sa mga survivors ng sunog. Punit-punit ang damit… sunog ang damit… basang-basa… may galos at paso… at nagka-smoke inhalation. Ms Jamie, according sa Barangay… 4 ang ambulansya na andoon noong gabi na iyon. Bakit kaagad mong isinalang sa live interview ang isang survivor ng sakuna?" tanong ng konsehala.
​
Aniya, "ang mga survivor ng sakuna ay considered traumatized. Dapat kaagad binibigyan iyan ng medical attention… debriefing… psychological evaluation… at higit sa lahat ina-isolate dapat 'yan sa publiko o sa media in-case may posibleng krimen ang dahilan ng pagkakasunog. In-interview mo ang survivor bago pa dumating ang SOCO," salaysay pa ni Delarmente.
​
Inireklamo rin ni Delarmente ang pagkuha ng bidyo sa pamilya nang hindi humihingi ng permiso sa mga ito. Nananawagan naman si Delarmente na itama na lamang ng GMA-7 ang kanilang balita hinggil sa kung paano nasawi ang kanilang tiyuhin.
​
Nakipagpulong naman ang pamunuan ng GMA-7 sa konsehala sa pamamagitan ng isang virtual meeting ngunit hindi pa rin humihingi ng paumanhin ang mga ito sa naganap bagamat nangakong iimbestigahan ang insidente.
Nais naman ng ibang konsehal na maipatawag din ang ilang mga institusyon ng pamahalaang responsable sa paghawak sa naganap na sunog upang mabatid kung bakit hindi nakakurdon ang area at kung paanong nakapasok ang media sa mismong fire site at kung kinakailahan bang magbalangkas ng ordinansa o anumang batas para hindi na maulit ang mga kahalintulad na insidente.###